ڪو شخص هلندي هلندي فوٽ پاٿ تي مري ويو،
دل جي اَٽيڪ ٿيندي فوٽ پاٿ تي مري ويو.
ڳوٺان کڻي ڪي آسون آيو هو شهر هِن ۾،
۽ خواب گهَر جا ڏِسندي فوٽ پاٿ تي مري ويو.
جنهن ٻارڙي کي حسرت کيڏڻ جي دل اندر هئي،
رانديڪڙا سو وٺندي فوٽ پاٿ تي مري ويو.
نڪتو هو ماني ڳولهڻ گِرجا مان جو مسيح اڄ،
هڪ روڊ پار ٽَپندي فوٽ پاٿ تي مري ويو.
هَٿُ هَٿَ ۾ ڏيئي آيو بازار مان وٺڻ ڪجهه،
جوڙو سو ٽهڪ ڏيندي فوٽ پاٿ تي مري ويو.
هڪ گهورَ خوبصورت؛ گوليءَ جيان لڳي، ۽-
هي بدر واٽ ويندي فوٽ پاٿ تي مري ويو.