شاعري

اُڃَ جو آسمانُ

نئون ڪتاب ”اڃ جو آسمان“ اوهان اڳيان پيش آهي. غزلن جي هن خوبصورت مجموعي جو تخليقڪار بدر شاهه آهي. بدر شاهه پنهنجي ٽهيءَ جو هِڪُ سنجيده ۽ سُڄاڻ شاعِرُ آهي. غزلُ سندس اندرَ جي اظهارَ جو مضبوط حوالو آهي ۽ هُنَ گهڻي قدر غزلَ ئي لکيا آهن. بدر شاهه جي شاعراڻي اوسر سنڌي ادبي سنگت ڪراچيءَ جي تنقيدي نشستن ذريعي ٿي آهي. سندس غزلن ۾ سندس اندرَ جون اڪيلائيون ۽ سماجَ پاران ڏنلَ گهاوَ محسوس ڪَري سگهجن ٿا. اسين سمجھون ٿا ته بدر شاهه جي شاعريءَ جو هي پهريون ڪِتابُ سنجيده شاعريءَ تي نِگاهه رکندڙَ نقادن ۽ پِڻُ پڙهندڙن جي توجهه جو مرڪز بڻجندو.
  • 4.5/5.0
  • 1546
  • 738
  • آخري ڀيرو اپڊيٽ ٿيو:
  • بدر شاهه
  • ڇاپو پھريون
Title Cover of book اُڃَ جو آسمانُ

زندگيءَ مٿان ڌرتتي کُٽي ئي نه ٿي،

زندگيءَ مٿان ڌرتتي کُٽي ئي نه ٿي،
ديس تان ڇو اڃان ڌرتتي کُٽي ئي نه ٿي؟

ڪيئن ڏِسان ته هُو ناتا ڇِني وئي آهي،
يارو! ڪيئن چوان ڌرتتي کُٽي ئي نه ٿي.

مَن سندس مُرڪ جو ڇانورو نصيب ٿئي،
هُن وَٽان ڇو اُٿان؟ ڌرتتي کُٽي ئي نه ٿي.

ڪو دَڳن کان کسي ويو آ ڇانوَ ٽالهين جي،
ڏور کان ٿو ڏِسان ڌرتتي کُٽي ئي نه ٿي.

هُو اکين جون چُميون اڄ ڪٿي اُڏامي ويون،
پيو ٿو آءٌ لڇان ڌرتتي کُٽي ئي نه ٿي.

سوال ڪهڙا هُو دَر ٻاهران رکي ويو آ،
مان کڻي ٿو پڙهان ڌرتتي کُٽي ئي نه ٿي.

چو طرف آ سياست جي گندگي پَکڙيل،
چاهه ڪنهن سان رکان؟ ڌرتتي کُٽي ئي نه ٿي.