ڇڏيو خرابيءَ-خَلل جون ڳالهيون،
اچو ڪيون ڪنهن ڪَنول جون ڳالهيون.
نه قاتلن جون نه مقتلن جون؛
ڪيون نظر جي ڪٺل جون ڳالهيون.
اکيون ۽ چَپ، توڙي چيلهه، ڇاتي،
سڄڻ ۾ سڀ هِن غَزل جون ڳالهيون.
اڇو رَئو، مُنهن تي وار وکريل،
اڱڻ ڪري پيو ستل جون ڳالهيون.
رني پرهه پئي؛ ڪيون پرينءَ ٿي-
جڏهن جدائيءَ مَهل جون ڳالهيون.
پڇن ٿا فٽ پاٿ وارا رب کان؛
فِليٽ ۽ گهَر ڦِٽل جون ڳالهيون.
ٺهن نه ٿيون بدر! زندگيءَ ۾؛
ڪجن ابد ۽ اَزل جون ڳالهيون.