ڪيڏو گذريو آهي ڪمرو اَذيت مان،
۽ هر لمحي منهنجو سپنو اَذيت مان.
اجلي مَنَ جي مُنهَن جو ڪوجهو رنگُ ڏِسي،
سُڏڪي پيو هو هڪ آئينو اَذيت مان.
ويڄ! ملاءِ نه زهر خدارا ! امرت ۾،
چڪنا چُور ٿي پوندو شيشو اَذيت مان.
سڄڻيءَ سامهن؛ ساجن زخمي تڙپي پيو،
هيڊو ٿيو آ هُن جو چهرو اَذيت مان.
قِسمين قِسمين ٽائر هن کي ڪُچلن ٿا،
سيڪنڊ سيڪنڊ ڪاٽي رستو اَذيت مان.
تنهنجي-منهنجي همّت سان ئي سانولڙي!
آجو ٿيندو دل جو رشتو اَذيت مان.