سون سريکي سنڌڙي
لَئي لِچڻ ۽ لاڻا تنهن ۾ لوڻڪ لوڻڪ جام ڏِسان.
هن ۾ ميندي موتيو مُگرو هن ۾ مورن مُرٽ مدام،
هن ۾ ڪوڻيون پاٻوڙا ۽ پالڪ پالڪ جام ڏِسان.
هن جا ماڻهو موتين جهڙا مٽ نه جن جو آهي ڪٿي،
پوڙها پوڙها جوان سگهارا ٻالڪ ٻالڪ جام ڏِسان.
هن ۾ هوشو هن ۾ دودا هن ۾ دريا خان دلير،
موتين هاڻي مٽي هن ۾ ماڻڪ ماڻڪ جام ڏِسان.
هن ۾ جوڌا جُنگ جنگير ۽ سورهيه سَو هزار،
هن ۾ شاهه ڀٽائيءَ جهڙا، سالڪ سالڪ جام ڏِسان.
هي سنڌو ديس سونهارو، جنهن جا سُهڻا صاف سنگهار،
هن ۾ لُنگيون کيس کٿا ۽ اجرڪ اجرڪ جام ڏِسان.