ملڻ ڏاڍو ڪو وڻندو آ
ڪري مُنهن کي مٿي ٿورو، ملڻ ڏاڍو ڪو وڻندو آ.
الائي ڪا خبر ڪانهي، الاهي ٿو وڻين ڇالئه،
سندءِ هر هوڏ وارو هي، هلڻ ڏاڍو ڪو وڻندو آ.
مٺا ماکيءَ جي ٿارن کان، چوان ٿو چَپَ سندءِ آهن،
اُنهن چَپڙن کي چوسڻ ۽، چُمڻ ڏاڍو ڪو وڻندو آ.
مٺا هر مهل موقعي تي، مڙن ماڻهن جي مهندان ٿي،
ڏئي هٿ هٿ ۾ جاني، گهُمڻ ڏاڍو ڪو وڻندو آ.
پرين توکان پري ناهن، ڀلو ٿئي بخت اي ‘سانگي’،
حسينن سان هميشه گڏ، هجڻ ڏاڍو ڪو وڻندو آ.