بندشون ڇالئه
وسائي نفرتن جون جڳ، پيو هي بارشون ڇالئه!؟
ملون ٻئي پاڻ جي گڏجي وڃي ماڻهن جو تنهن ۾ ڇا!؟
سڄو ڏينهن سي ته بي سُرتا سِٽين پيا سازشون ڇالئه!؟
لڳي ٿو ڪان تن ڪهڙو، پچن ٿا ڇو ڀلا پاپي!؟
دلين ٻن کي دُکائڻ جون پيا ڪن ڪوششون ڇالئه!؟
وڃي تن جي گهران ڇا ٿو لڳي ٿي باهه تن ڪهڙي،
رقيبا روح پنهنجي کي رسائين رنجشون ڇالئه!؟
پيا پنهنجي پُٺيان ‘سانگي’ ڀلا ڇو بيرحم آهن!؟
اندر ۾ تن اوهيڙن جي اچن ٿيون آتشون ڇالئه!؟