شاعري

سرور

مسرور پيرزادي جي شاعريءَ ۾ ٻوليءَ جي سادگي، لفظن جي چونڊ ۽ عنوان، شاعريءَ جا خيال سچ تہ دلچسپ ۽ وڻندڙ آهن.  مسرور دلرباين، دلڪشين ۽ حسناڪين جو شاعر آهي. مسرور سونھن، سندرتا، سچ، محبت ۽ ڪائنات جي حسناڪين سان پيار ڪندڙ شاعر آهي. مسرور سنڌي غزل کي اوج ڏنو ڏنو آھي. سندس نظم پڻ منفرد آھن.

Title Cover of book Suroor

عشق جنھن جي ڪئي امامت آ،

عشق جنھن جي ڪئي امامت آ،
عمر ڀر سا ڪئي عبادت آ.

ھاڻ خاموش ٿي ٻڌو يارو!
عشق جي ٿي رھي تلاوت آ.

ھوءَ ڏسي ديد پاڪ ٿي ويئي،
ايتري ھوءَ خوبصورت آ.

ھي پرين آھہ يا خدا آھي؟
ھي مجاز آھہ يا حقيقت آ؟

ھاڻ نفرت سان ڀي نہ نفرت آ،
ھاڻ ھر چيز سان محبّت آ.

عشق جي سمنڊ مان ڪوئي موتي،
جي ملي پئي تہ ڀي غنيمت آ!

جيترو سوچجي تہ منجهجي ٿو،
ھيءَ دنيا بہ ڪا ڳجهارت آ!