جهولو
اڄ الائي ديس ڪھڙي ٿي وسي!
ھوءَ جيڪا وار کولي پئي جهلي،
۽ جهلي، مرڪي وري مون کي ڏسي،
سا الائي ديس ڪھڙي ٿي وسي!
ٿي سگهي ٿو ھوءَ ھاڻي ڇوڪري،
ڀاڪرن جو جهولو ڪو جهلندي ھجي.
يا ننڍي ڪنھن ٻار پنھنجي کي پئي،
ھنج جي جهولي ۾ جهوليندي ھجي،
يا اِئين ڀي ٿي سگهي ٿو ھاڻ ھوءَ،
زندگيءَ جي تيز جهولي تان ڪري،
ڪنھن قبر ۾ ننڊ اڄ پيئي ھجي.
ھوءَ الائي ڪٿ رھي ٿي ڇوڪري،
ھاڻ خالي ھيءُ جهولو آ پيو،
ھا مگر اڄ اِئن مون کي آھي لڳو،
ڄڻ تہ منھنجي دل بڻي جهولو ھجي،
جنھن تي ساڳي ڇوڪري جهلندي ھجي.
*