قبيلن جا جرڳا
ڪھاڙيءَ جھڙي ڪنھين فيصلي سان،
محبّت جي سازن سريلن تي نچندڙ
دلين تي ڪيو وار آھي.
محبّت جي وڻ جو ٽٽو ڏار آھي!
انھي وڻ تي ويٺل پکي سڀ
اميدن جا رڙندا اڏي ويا.
قبيلن جا جرڳا
اھا آڳ آھن جنھين ۾
سنھين ۽ ٿلھين ڪاٺڙين جئن
ڪئين روز ماڻھو جلن ٿا،
مرن ٿا،
قبيلن جا سردار سارا
انھي آڳ تي ھٿ سيڪن ٿا پنھنجا.
قبيلائي جهيڙن ۾ وھندڙ لھوءَ سان
ڪا تاريخ لکبي
تہ ان ۾ ھي لکبو:
اھي ئي قبيلا
محبت جا مقتل رھيا ھن!
محبّت جا مقتل رھيا ھن!