آنءُ اڌورو آھيان
آءُ! تہ پورو ٿيان،
آءُ پرين! اوري اڃان.
آھين منھنجي آرسي،
آءُ تہ پاڻ پسان،
آءُ پرين! اوري اڃان.
دل جي دوري جي نہ آ
پوءِ ڇو دور اسان؟
آءُ پرين! اوري اڃان.
تو ۾ مٺڙي! منتقل،
اچّ تہ آنءُ ٿيان،
آءُ پرين! اوري اڃان.
تنھنجي تن مان گذرندي،
من ۾ آنءُ ملان.
آءُ پرين! اوري اڃان.
مون سان ڀي سا ڪار آ
”پيئان نہ ڍاپان.“
آءُ پرين! اوري اڃان.
*
ٻئي جي بستر تي بہ تون، منھنجي آھين اِيئن،
ھئي سھڻي جيئن، ڏم ھوندي ميھار جي!