کلن سک ڏي سوين رستا، جڏھن تون مسڪرائين ٿي
سمھن ٿا سور ۽ صدما، جڏھن تون مسڪرائين ٿي.
خدا خود خوبصورت آ، پسند ھر خوب شيءِ ھن کي،
خدا خوش ٿو ٿِئي يارا! جڏھن تون مسڪرائين ٿي.
مٺي آ مرڪ مصريءَ کان، مٺي آ مرڪ ماکيءَ کان،
سڀئي ميٺاج ٿين ماٺا، جڏھن تون مسڪرائين ٿي.
تنھنجي مرڪن جي موسيقي، ٻڌي ماحول ٿو جهومي،
وڄي ٿي ڄڻ تہ ڪا وينا، جڏھن تون مسڪرائين ٿي.
رھي ٿي رات ڄڻ ڪاري، جڏھن ٿي تون رسين راڻي!
صبح جا ٿين سويرا ٿا، جڏھن تون مسڪرائين ٿي.
دنيا جا باغ، باغيچا، تنھنجي ئي سونھن سان سرھا،
کلن پوپٽ، کڙن گلڙا، جڏھن تون مسڪرائين ٿي.
اسان جي اختيارن ۾، ڪٿي توکي ڪڍڻ دل مان!
کلن ٿا دل جا دروازا، جڏھن تون مسڪرائين ٿي.