تنھنجي لاءِ دعا
۽ تنھنجو محبوب ڀي توکي مليو آ،
ڇو تہ تنھنجي ھاڻ نيڻن ۾ چمڪ ڪائي نئين آ،
مک تنھنجي تي دمڪ ڪائي نئين آ.
ھاڻ تنھنجي ڀي چپن جي گل تي
خوبصورت مرڪ جا پوپٽ لڏن ٿا.
کل تنھنجيءَ ۾ سڄي سنسار جا ڏکڙا مرن ٿا،
ھاڻ تنھنجي ڳالھڙين واري نديءَ تي،
پيار جا پنڇي لھن ٿا،
ھاڻ ساري تنھنجي ھستيءَ مان پئي ٿي،
عشق جي ئي عطر جي خوشبو اچي
ھاڻ تنھنجي لوڏ مان ڀي
عاشقي پيئي بکي.
ھاڻ تون ڀي دير تائين چاندنيءَ ۾
وار کولي ٿي گهمين،
۽ ستارن سان سڄڻ جون
تون مسلسل ٿي پئي ڳالھيون ڪرين،
ھاڻ سينگارن منجهان تنھنجي لڳي ٿو،
عشق توکي ٿي ويو آ،
۽ تنھنجو محبوب ڀي توکي مليو آ.
ھا پرين! مان ڀي دعا توکي ڪيان ٿو،
ھو سدا توسان ملي،
۽ ملي توسان کلي،
شال تنھنجي مک جي پياري چمڪ قائم رھي دائم رھي!
کل تنھنجيءَ جي نہ ھيءَ خوشبو کٽي!
مرڪ تنھنجي ڀي سدا مٺڙي ھجي!
گل وانگر جسم ھي ٽڙيل رھي!
شال تنھنجي ھن جوانيءَ تي خوشي
مينھن وانگر پئي وسي!
درد دل ۾ ڪو نہ تنھنجي ڀي ڪڏھن ديرو ڪري!
تون ھميشہ ئي رھين ڀاڳن کي آکيرو ڪري!
شال پياري خيال منھنجو ڪو نہ توکي ڪو اچي!
جو سندءِ دل کي دکائيندو رھي
سوچ تنھنجيءَ کي ستائيندو رھي.
*
سانڍيو آھي ساھہ سان، تنھنجو گــُل ڏنل،
توڻي ھاڻ سڪل، پوءِ ڀي سرھو سانوري!