وار کولي کلي رھي آھي
شاعري ڄڻ ڪري رھي آھي.
”ڇا خدا آھہ؟“ ان ڳجهارت کي،
حسن سان ھوءَ ڀڃي رھي آھي.
ماڪ کي سج جي خبر آھي،
پو بہ گل کي چمي رھي آھي.
ڳالھہ جا ڪن ۾ ڪيئہ جانان!
ھل ٿي اڄ ھلي رھي آھي.
چاندنيءَ ۾ چمان پيو توکي،
رات حيران ٿي رھي آھي.
ڀاڪرن ۾ ڀريان پيو ھن کي،
گل وانگي ٽڙي رھي آھي.
رات جو خواب ۾ ملي مون سان،
صبح، بستر ڏسي رھي آھي.
”ايترو ڪيئن مون کي چاھين ٿو؟“
ھوءَ ھر ھر پڇي رھي آھي.
موڪلائي وڃان پيو واپس،
ھوءَ دريءَ مان ڏسي رھي آھي.
پيار، دولت ملي وئي شھرت،
پو بہ ڪائي ڪمي رھي آھي.
*