تاريخ
اھي جنرل، اھي فوجي، پنھنجي مرضيءَ وارا ھن.
لٽن، کائن پيا ھي ۽ پڇڻ وارو بہ ڪونھي ڪو،
لٽن ٿا لڄ ڌرتيءَ جي، ڪڇڻ وارو بہ ڪونھي ڪو.
انھن امريڪي سازش سان، ڌڪيو آ ديس پنھنجي کي،
وديشي تن ڪتن وانگر، چڪيو آ ديس پنھنجي کي.
انھن فوجين لتاڙيو آ، وطن ھي لانگ بُوٽن سان،
گلن سان واسيل سارو، چمن ھي لانگ بُوٽن سان.
سڪائي سنڌ ساريءَ کي، انھن اڳواڻ ڀي ماريا،
اسان تي ديس پنھنجي ۾ مسلط ڪيا ڪئي ڌاريا.
لٽيرا ھي پھاڙن جا، لٽيرا ھي درياھن جا،
لٽيرا ھي وسيلن جا، لٽيرا ھي ڪتابن جا.
جڏھن کان ھي بڻيو آھي تہ پاڪستان سان ڇا ٿيو؟
انھي جي شان سان ڇا ٿيو؟ انھي جي مان سان ڇا ٿيو؟
انھن جو ٽوڙيو، اوڀر، جي پاڪستان سان ڇا ٿيو؟
وزيرستان سان ڇا ٿيو؟ بلوچستان سان ڇا ٿيو؟
اسان جي زندگي گذري پئي ھيڻي سوالن ۾،
انھن وٽ گوليون، ڦاھيون، رڳو آھن جوابن ۾!