جنھن سان ڪئي تو عاشقي، ڏس ڪير آ؟ ڏس ڪير آ؟
جنھن جي سرن من ڪيو مگن، ھٿ پير ٿا جنھن تي لڏن،
ھن روح جي ھوءَ راڳڻي، ڏس ڪير آ؟ ڏس ڪير آ؟
اڳ ۾ بہ دل لڳيون ڪيئھ، مستيون ۽ بس مڳيون ڪيئھ،
جنھن جي ڪرين ٿو بندگي، ڏس ڪير آ؟ ڏس ڪير آ؟
ھوءَ چنڊ جي ڄڻ چاندني، ھوءَ سجّ جي ڄڻ روشني،
ھوءَ ساھہ جھڙي سانوري، ڏس ڪير آ؟ ڏس ڪير آ؟
ڏس ڪير آ؟ ڏس ڪير آ؟ ھوءَ جيڪا تنھنجي زندگي؟
ھوءَ جيڪا تنھنجي زندگي، ڏس ڪير آ؟ ڏس ڪير آ؟
*
آھہ سڪي وئي ڳل تان چميءَ جي آلاڻ،
پر سا رھندي ھاڻ، دل تي ساري زندگي.