متان پرواه ڪنهن جي تون ڪرين دلبر زماني ۾
نه ڪو ويساه ڪرڻو آ-حقيقت جو فساني ۾
چيو هو ڪن-ٻڌو هو مون-وفا وارا رهن ٿا ڪئين
جگر گوشي ڪيو آ تيئن-جيئن پٿري مثاني ۾
وڏي دلڙي ڪري هلبو نظر چوگرد ڦيرائي
رکي هلبو زماني جي رقيبن کي نشاني ۾
اگر مايوس رهندين تون ته پو گاڏو هلندو ڪيئن
مٺا زنده ته رهڻو آ-جهان جي ڪارخاني ۾
همت ڪر اُٿ کڙو ٿي يار لوڏي ڇڏ زماني کي
حصو تنهنجو به آهي هن جهان جي ڪل خزاني ۾
تجربا ڇڏ نه هيڏي وڃ نه هوڏي وڃ بيهي پختو
جهلي وٺ هر پلر دنيا سندي هن قيد خاني ۾
ڀلي ڪو ڪيئن چوي پيو ڀل-توجه ڪو نه ڏي ڪنهن ڏي
ڀري ڇڏ تون وجهي مڌرا-صفا خالي پيماني ۾
ڇڏي ڏيندين ته ڇا ٿيندو هتي رهيجي ته تون ويندين
هي تنهنجو آ-وڃي ڇا ڪنهن ٻئي جو هن آستاني ۾
نگاهون کڻ بهارون ڏس زمانو هي سڄو تنهنجو
مزو وٺ تون کُلي دل سان-گهمي ڏس آشياني ۾
سڄڻ منهنجا سدا خوش ره-سدائين مسڪرائي پيو
جڏهن ايندين کلي ملجان-ملڻ جي ڪنهن بهاني ۾
خداوندا حفن بس ناصحا آهي نه هادي آ
اهو پاور ته تنهنجو آ-عطا ڪر سُر تراني ۾