پنهنجي مڙس کي دلجاءِ ڏيو:
زندگيءَ جو بار مرد جي ڪلهن تي ئي هوندو آهي. ڪٽنب جو خرچ پکو هر حال ۾ پورو ڪرڻ سندس ئي ذميواري هوندي آهي. کيس گهر کان ٻاهر الائي جي ڪيتريون تڪليفون ڏسڻيون پونديون آهن. ڪڏهن کيس بالادست آفيسر جا دڙڪا داٻ سهڻا پوندا آهن ته ڪڏهن وري پنهنجي ساٿين پاران ڪا تڪليف ملندي آهي. ان کان سواءِ آفيس ۾ ٻيا به ڪيترائي مسئلا ٿي سگهن ٿا. جيڪڏهن هو دڪاندار آهي ته پوءِ ائين ٿي سگهي ٿو ته سندس وڪري گهٽ ٿيندي هجي. مطلب ته مڙس ويچارو هڪ مسئلي ۾ نه پر اڻ ڳڻين مسئلن ۾ ڦاٿل رهندو آهي. روزاني زندگيءَ ۾ کيس ڪيترين ئي پريشانين سان منهن ڏيڻو پوندو آهي. اهوئي سبب آهي جو مردن جي عمر عورتن جي ڀيٽ ۾ گهٽ ٿيندي آهي. آخر هڪ ماڻهو ذهني پريشانين ۽ ڳڻتين کان ڪيتري حد تائين آجو رهي سگهي ٿو؟
ان حالت ۾ هڪ ماڻهوءَ کي ان ڳالهه جي شديد ضرورت پوندي آهي ته ڪو کيس دلجاءِ ڏيڻ وارو هجي ته جيئن سندس ٿڪل ذهن ۽ روح ڪجهه آرام وٺي سگهي.
ڀيڻ! توکان سواءِ تنهنجي مڙس جو ٻيو ڪو به غمخوار نه ٿو ٿي سگهي. گهر کان ٻاهر جي مسئلن کان ڀڄي اچي هو گهر ۾ پناهه وٺندو آهي ۽ اهڙي حالت ۾ کيس تنهنجي دلجاءِ ۽ تسليءَ جي ضرورت هوندي آهي. جيڪڏهن هو ڪنهن ڏينهن پريشان ۽ غمگين ٿي گهر اچي ته پوءِ پهرين کان به وڌيڪ کيس تنهنجي ڌيان جي ضرورت پوندي آهي. تنهن ڪري توکي گهرجي ته تون جَهٽ پٽ سندس آرام، کائڻ پيئڻ ۽ چانهه وغيره جو بندو بست ڪري وٺ. اهڙي موقعي تي ساڻس ٻين موضوعن تي ڳالهه ٻولهه نه ڪر، نه ڪا کانئس فرمائش ڪر، نه ڪا شڪايت ڪر ۽ نه ئي مٿس ٽوڪ ٺٺول ڪر. کيس ڪجهه دير لاءِ آرام ڪرڻ ڏي ته جيئن هو ذهني ٿڪاوٽ لاهي سگهي ۽ جيڪڏهن هو ماني کائي رهيو آهي ته کيس دلجاءِ سان کائڻ ڏي. جڏهن سندس ٿڪاوٽ لهي وڃي ته پوءِ کانئس پيار مان پريشانيءَ جو سبب معلوم ڪر ۽ جيڪڏهن هو ڪنهن پهتل تڪليف بابت ٻڌائي ته کيس ڌيان سان ٻڌ. ٽوڪ ٺٺول يا مذاق ڪرڻ بدران تون سندس پريشاني ٻڌي ساڻس افسوس جو اظهار ڪري ۽ پنهنجي هلت مان اهو ظاهر ڪري سندس ڏک مٽائڻ جي ڪوشش ڪر ۽ پريشانين ۽ مسئلن کي سندس اڳيان صفا معمولي ۽ حقير ظاهر ڪر ۽ انهن کي حل ڪرڻ سندس همت ٻڌراءِ. کيس اهو چئه ته اهڙي قسم جا مسئلا ته ايندا رهندا آهن تنهن ڪري صبر ۽ همت وسيلي انهن کي حل ڪري سگهجي ٿو. اصل ۾ اهڙن ئي موقعن تي ماڻهوءَ جي شخصيت ۾ مردانگي ظاهر ٿيندي آهي. پريشان ٿيڻ بدران صبر ۽ ڪوشش کان ڪم ورتو وڃي ته مسئلا آسانيءَ سان حل ٿي سگهن ٿا. جيڪڏهن تنهنجي مڙس کي تنهنجي رهنمائيءَ جي ضرورت آهي ۽ جيڪڏهن سندس مسئلي جو ڪو حل تو وٽ آهي ته پوءِ ساڻس ضرور سهڪار ڪر ۽ جيڪڏهن توکي ڪو حل ڪونه سجهي ته پوءِ کيس راءِ ڏي ته هو پنهنجي ڪنهن گهڻ گهري دوست ياڪنهن مٽ مائٽ سان صلاح مشورو ڪري.
ڀيڻ! مشڪلاتن ۽ پريشانين وقت تنهنجي مڙس کي تنهنجي دلجاءِ ۽ تسليءَ جي ضرورت پوندي آهي. تنهن ڪري توکي سندس مدد ڪرڻ گهرجي. توکي هڪ مهربان نرس ۽ هڪ هڏ ڏوکي نفسيات جي ماهر وانگر سندس دلجاءِ ڪرڻ ۽ همت ٻڌرائڻ گهرجي. اهڙي موقعي تي توکي پنهنجي شخصيت کي سگهارو ۽ همت وارو بنائڻ گهرجي ته جيئن تنهنجي مڙس جو ڳڻتيون لهي وڃن. ڀيڻ! تون پنهنجي سگهه جو ڪاٿو بنهه نه ٿي ڪري سگهين! تنهنجي پيار، مهرباني ۽ دلجاءِ جي سگهه تنهنجي مڙس تي جادوءَ جهڙو اثر ڪري سگهي ٿي. تون ائين ڪري سندس دل ۽ ذهن کي سڪون ڏئي سگهين ٿي. پوءِ هو زندگيءَ ۾ دلچسپي وٺڻ لڳندو ۽ منجهس مسئلن کي حل ڪرڻ جي سگهه اچي ويندي. گڏوگڏ هو اها ڳالهه پڻ ڀائيندو ته هو اڪيلو ناهي پر سندس گهر واري به مسئلن کي حل ڪرڻ جي ڏس ۾ سندس ساٿياڻي آهي. تنهنجي وافاداري منجس وڏو ڀروسو پيدا ڪندي ۽ اهڙي طرح توهان جي ازدواجي زندگي اڃا به سگهاري ۽ جٽادار ٿي پوندي.
حضرت جعفر صادق رحه فرمائي ٿو ته، ”دنيا ۾ اهڙي زال کان ڀلي ٻي ڪا به شيءَ نه ٿي ٿي سگهي جنهن کي ڏسي مڙس جي دل خوشيءَ ۾ ٽمٽار ٿي وڃي.