مردن جا شغل:
ڪجهه مردن جا گهر ۾ ڪي خاص شوق شغل هونداآهن جن کي هابي (Hobby) چئبو آهي، جهڙوڪ: ٽڪليون گڏ ڪرڻ، تصويرون گڏ ڪرڻ، آٽو گراف وٺڻ، ڇپيل يا قلمي ڪتاب گڏ ڪرڻ ۽ پڙهڻ، پکي پالڻ، اداڪاري ڪرڻ، ڳائڻ وڄائڻ، پينٽنگ ڪرڻ وغيره. اهڙي قسم جي شغلن کي فائديمند وندر چئي سگهجي ٿو. اهڙن شغلن جو ڪوبه نقصان ناهي هوندو پر ان جا ڪيترائي فائدا هونداآهن. انهن شغلن جي ڪري جئين ته مرد جو گهڻو تڻو وقت گهر ۾ گذرندو آهي، ان ڪري سندس ٿڪاوٽ پڻ لهي ويندي آهي. واندڪائي غم ۽ غصو پيدا ڪندي آهي. جڏهن ته ڪم ڪار کي ذهني بيمارين جي علاج جو هڪ لاڀائتو طريقو سمجهيو ويو آهي. جيڪي ماڻهو سدائين ڪنهن ڪم ڪار ۾ رڌل هونداآهن سي جسماني ۽ نفسياتي بيمارين کان بچيل رهندا آهن. نه رڳو اهو پر اهي اجايو گهمڻ گهتڻ، برين حرڪتن ڪرڻ ۽ جوا ۽ فحاشيءَ جي اڏن تي وڃڻ کان بچي وينداآهن.
تنهنڪري عورتن کي گهرجي ته اهڙي قسم جي شغلن کي سٺي نظر سان ڏسن، مرد تي ٽوڪ ٺٺول نه ڪن ۽ سندس شغلن کي اجايو ۽ ٻاراڻو نه سمجهن، کيس همٿائين ۽ وقت ملي ته سندس هٿ به ونڊائين.