زال جي پرگهور لهڻ:
اسلامي شريعت ۾ جهڙيءَ طرح مرد جي سارسنڀال کي هڪ عورت لاءِ جهاد سان ڀيٽيو ويو آهي، اهڙي طرح زال جي پرگهور لهڻ کي مڙس جو سڀ کان مکيه عمل سمجهيو ويو آهي ۽ ان ئي ڪٽنب جي ڀلائي لڪل آهي. پر زال جي پر گهور لهڻ ڪو سڻائو ڪم ناهي. اهو هڪ اهڙو راز آهي جنهن کان هر مڙس کي سنوهون هجڻ ضروري آهي ته جيئن پنهنجي زال کي پنهنجي مرضيءَ مطابق هڪ آئيڊيل عورت بنائي سگهي.
جيڪي مرد هڪ مڙس جا فرض پورا ڪرڻ چاهيندا هجن تن کي گهرجي ته اهي زال جي دل موهي رکن، سندس دلي خواهشن ۽ لاڙن کي سمجهندي زندگيءَ جو پروگرام ترتيب ڏين ۽ پنهنجي سٺي اخلاق ۽ ورتاءَ وسيلي مٿس اهڙو ته اثر ڇڏين جو هوءَ پاڻ هُرتو سندس وس ۾ اچي وڃي. جيڪڏهن ائين ٿيو ته پوءِ هوءَ گهر کي پنهنجو سمجهندي ۽ گهر جا ڪم ڪار سهڻي نموني پورا ڪندي رهندي.