مڙس ڪاوڙ ۾ هجي ته چپ رهجي:
گهر کان ٻاهر مرد کي الائي جي ڪيترين پريشانين سان مُنهن ڏيڻو پوندو آهي. هو جڏهن ٿڪل ٽٽل گهر موٽندو آهي ته کيس ڪا به ڳالهه ناهي وڻندي ۽ ٿوريءَ ٿوريءَ ڳالهه تي ڪاوڙ اچي ويندي اٿس. اهڙي حالت ۾ ٿي سگهي ٿو ته هو زال کي گهٽ وڌ ڳالهائي ۽ ٻارڙن کي به دڙڪا داٻ ڏئي. هوشيار ۽ سمجهدار زالون پنهنجي مڙس جي مسئلن ۽ پريشانين کي ڏسي صبر ڪنديون آهن ۽ سندس رڙين دانهن تي ماٺ ڪنديون آهن. ان جو فائدو اهو ٿيندو آهي جو مڙس، زال جو وڻندڙ رد عمل ڏسي جلد ئي پنهنجي ڪاوڙ ٿڌي ڪري ڇڏيندو آهي ۽ پنهنجي ڪئي تي پڇتائيندو آهي ۽ معافي به وٺندو آهي جڏهن ڪاوڙ ٿڌي ٿي ويندي آهي ته پوءِ هو زال ۽ ٻارڙن سان پيار ۽ محبت ڪرڻ لڳندو آهي. پر جيڪڏهن زال، مڙس کي ڪاوڙ ۾ ڏسي پنهنجو رد عمل ڏيکاريندي ۽ کيس گهٽ وڌ ڳالهائيندي ته پوءِ ڳالهه خراب ٿي ويندي. ظاهر آهي ته پوءِ مرد به ڪاوڙ ۾ تپي باهه باهه ٿي ويندو، رڙيون ڪرڻ ۽ گارگند ڏيڻ شروع ڪندو. اهڙيءَ طرح ٿوري دير ٻئي زال مڙس گهر مٿي تي کڻي ڏيندا.
ڪڏهن ڪڏهن ته ننڍڙي ڳالهه تان به طلاق ٿي ويندي آهي ۽ سڄو ڪٽنب تباهه ٿي ويندو آهي. گهڻيو طلاقون اهڙين ئي ننڍين ننڍين ڳالهين تان ٿينديون آهن. سچ پچ ته ڪاوڙ هڪ جنون آهي ۽ ٻرندڙ جبل وانگر ڦاٽي پوندو آهي. ماڻهو ڪاوڙ ۾ اچي قتل به ڪري ڇڏيندا آهن.