اسلامي پردو:
عورت ۽ مرد ٻنهي ۾ جيتوڻيڪ ڪي ڳالهيون هڪ جهڙيون به هونديون آهن پر منجهن ڪي فرق به هوندا آهن، انهن ۾ هڪ فرق اهو آهي جو عورت هڪ لطيف، نازڪ، خوبصورت ۽ پياري هستي آهي. عورت دلبر آهي ته مرد وري دلدار. جڏهن مرد ڪنهن عورت سان شادي ڪندو آهي ته، پوءِ سندس اها خواهش هوندي آهي ته ان وڻندڙ ۽ پياري هستيءَ جون هڙئي خوبيون رڳو سندس جي ئي ذات تائين محدود هجن. گڏوگڏ هو اهو پڻ چاهيندو آهي ته سندس زال پنهنجي سموري خوبصورتي، ناز نخرا ۽ شوخي ۽ دلبري پنهنجي مڙس لاءِ ئي مخصوص ڪري ڇڏي ۽ غير مردن جو پاڇو به نه ڏسي. مرد ڏاڍو غيرتمند ٿيندو آهي، تنهنڪري هو ان ڳالهه کي هرگز برداشت ناهي ڪري سگهندو ته ڪو غير مرد سندس زال تي نظر وجهي يا ساڻس ڪو لاڳاپو رکي، ڳالهائي ياکل ڀوڳ ڪري. هو اهڙين ڳالهين کي پنهنجي جائز حق تي ڌاڙو سمجهندو آهي. اهوئي سبب آهي جو هو پنهنجي زال مان اها اميد رکندو آهي ته هوءَ اسلامي ويس وڳو پائي ۽ پردي جو پڻ خيال ڪري. گڏوگڏ شرعي اصولن ۽ اخلاقي قانونن جي پابندي ڪري، اسلامي شرم ۽ حياءَ ۽ شرافت کان ڪم وٺندي پنهنجي مڙس جي ان جائز خواهش جي پوراءَ ۾ ساڻس سهڪار ڪري. جيڪڏهن سندس زال ان اسلامي ۽ سماجي فرض تي عمل ڪندي ته پوءِ هو دلجاءِ ۽ سڪون سان زندگي گذاريندو ۽ پنهنجي ڪٽنب جون گُهرجون پوريون ڪرڻ لاءِ وڌيڪ محنت ڪندو. اهڙيءَ طرح هو پنهنجي زال ۽ ٻارڙن سان ڏاڍي محبت ڪندو ۽ پوءِ اهائي محبت کيس ٻين عورتن ڏانهن لاڙو رکڻ کان روڪڻ جو ڪارڻ بڻبي.
پر ان جي ابتڙ جيڪڏهن مرد ڏسندو ته سندس زال اسلامي پردي جو ڪو خيال نه ٿي رکي ۽ پنهنجي حسن کي ٻين جي اڳيان ظاهر ڪري ٿي ۽ ساڻن لاڳاپا رکي ٿي ته پوءِ هو ڏاڍو ناراض ٿي ويندو ڇو جو هو ان کي پنهنجي حق تلفي سمجهندو آهي ۽ زال کي ئي ان حق تلفيءَ جو ذميدار سمجهندو آهي. اهڙا مرد سدائين شڪ شبهي ۾ ڦاٿل رهندا آهن ۽ هوريان هوريان پنهنجي زال ۽ ٻارڙن سان سندن محبت آهي.
معاشري ۽ عورتن جو ڀلو ان ۾ آهي ته عورتون پنهنجي حسن جو ڏيکاءُ ڌارين جي اڳيان هرگز نه ڪن، ٺاهه جوڙ ۽ هار سينگار ڪرڻ کان سواءِ ئي گهر کان ٻاهر نڪرن ۽ ڪوشش ڪري ڌارين مردن کان پاڻ کي لڪائين. پردي جي پابندي هڪ اسلامي فرض آهي. الله پاڪ قرآن شريف ۾ فرمايو آهي ته:
”مومن عورتن کي چؤ ته ڌارين مردن جي اڳيان پنهنجون نظرون جُهڪيل رکن، پنهنجي شرم گاهن جي حفاظت ڪن، پنهنجي خوبصورتي ۽ هار سينگار وارن هنڌن کي ڌارين لاءِ ظاهر نه ڪن سواءِ انهن عضون جي جيڪي فطري طور تي ظاهر آهن (جهڙوڪ هٿ ۽ چهرو)، پنهنجي ڇاتين کي پنهنجي پوتين سان ڍڪي رکن ۽ پنهنجي حسن ۽ جمال کي سواءِ پنهنجي مڙس، پنهنجي پيءُ ڏاڏي، مڙس جي پيءُ ڏاڏي، پنهنجي پُٽن، پنهنجي مڙس جي پُٽن، پنهنجي ڀائرن، پنهنجي ڀاڻيجن ۽ ڀائيٽن جي، ٻئي ڪنهن تي ظاهر ٿيڻ نه ڏين.“
اسلامي ويس وڳي ۽ پردي جي پابندي ڪرڻ عورتن جي ئي ڀلي ۾ آهي، جهڙوڪ:
1- سماج ۾ پنهنجي وجود جي قدر ۽ رتبي کي چڱيءَ ريت بچائي سگهن ٿيون ۽ پنهنجو پاڻ کي ڌارين جي بڇڙين نظرن کان پڻ محفوظ رکي سگهن ٿيون.
2- عورتون اسلامي ويس وڳن ۽پردي جو خيال ڪري پنهنجي مڙس جي ڀيٽ ۾ پنهنجي پيار ۽ محبت جو وڌيڪ ثبوت ڏئي سگهن ٿيون ۽ اهڙيءَ طرح گهر ۾ سڪون ۽ پيار وارو ماحول پيدا ڪرڻ ۾ مدد ڪري سگهن ٿيون. ائين ڪرڻ سان شڪ شبهي پيدا ٿيڻ جي امڪان کي ختم ڪري سگهجي ٿو. مطلب ته ائين ڪري عورتون پنهنجي مڙسن جون دليون سولائي سان کٽي سگهن ٿيون ۽ پنهنجي عزت ۽ رتبي جو بچاءَ ڪرڻ ۾ پڻ سوڀاريون ٿي سگهن ٿيون.
3- اسلامي پردي جو لحاظ ڪندي عورتون ڌارين مردن کي پنهنجي ويجهو اچڻ کان روڪي سگهن ٿيون. ائين ڪرن سان ڪٽنب جا گڏيل لاڳاپا ڳانڍاپا اڃا به وڌيڪ سگهارا ٿي سگهن ٿا.
4- اسلامي پردي وسيلي عوتون انهن اڻ پرڻيل مردن کي سڌاري سگهن ٿيون جيڪي ذهني ڪمزورين ۽ خراب عادتن جي ڪري سڄو ڏينهن عورتن جي پويان هونداآهن.
5- جيئن ته اسلام عورت جي خاص صلاحيتن کان واقف آهي ۽ کيس سماج جو هڪ مکيه رڪن سمجهي ٿو تنهن ڪري معاشري جي پاڪيزگي يا ڇڙواڳيءَ جي ذميواري به مٿس ئي لڳائي ٿو. اسلام عورت کان اها گهر ڪري ٿو ته هوءَ پنهنجي ان وڏي ذميواريءَ کي سٺي نموني ۽ اسلامي پردي جو خيال رکندي سماجي بُراين ۽ فحاشين کي ٻُنجو ڏي، پنهجي ملت جي عظمت، مٿڀرائپ ۽ مضبوطيءَ لاءِ ڪوشش ڪري ۽ ان ڳالهه تي پورو پورو ويساهه رکي ته ان وڏي فرض پوري ڪرڻ تي خدا تعاليٰ پاران کيس وڏو اجر ۽ انعام ڏنو ويندو.
ڀيڻ! جيڪڏهن تون پنهنجي مڙس جو اعتماد حاصل ڪرڻ چاهين ٿي، جيڪڏهن توکي پنهنجي ڪٽنب جو سڪون ۽ آرام کپي، جيڪڏهن تون پنهنجي معاشري جي عورتن جي ڀلائيءَ لاءِ ڪجهه ڪرڻ گهرين ٿي، جيڪڏهن توکي نئين ٽهيءَ جي نفسياتي بچاءَ ۽کين لُچائيءَ کان روڪڻ جي ڳڻتي آهي، جيڪڏهن تون چاهين ٿي ته عورتن کي مردن کي ريجهائڻ ۽ دوکو ڏيڻ جهڙي بڇڙيءَ عادت کان ڇڙواڳيءَ، جيڪڏهن تون خدا پاڪ جو راضپو حاصل ڪرڻ چاهين ٿي ۽ هڪ مؤمن ۽ وفادار زال وانگر زندگي گهارڻ چاهين ٿي ته پوءِ اسلامي پردي جي پابندي ڪر ۽ پڻ خوبصورتيءَ ۽ هار سينگار کي ڌارين تي ظاهر نه ڪر، پوءِ توڙي تون گهر ۾ پنهنجي مٽن مائٽن سان گڏ هجين يا وري گهر کان ٻاهر. تنهنجا ڏير، مڙس جا ڀاڻيجا ۽ ڀائيٽا، تنهنجي ڏيراڻين جا مڙس، تنهنجا ڀيڻيويا، تنهنجا پڦڙ، ماسڙ، تنهجا ماسات، سؤٽ، ماروٽ ۽ پڦاٽ تنهنجا نامحرم آهن جن کان پردو ڪرڻ واجب آهي. جيڪڏهن تون انهن کان پردو نه ڪندينءَ ته گناهگار ٿيندينءَ ۽ پنهنجي مڙس جي دل کي پڻ رنجهائيندينءَ. ٿي سگهي ٿو ته تنهنجو مڙس توکي ڪجهه نه چئي پر پَڪ ڄاڻ ته اها ڳالهه توکان ۽ گهر کان مُنهن موڙڻ جو ڪارڻ بنجي سگهي ٿي.
ڀيڻ! تنهنجو پيءُ، تنهنجا ڀائر، ڀاڻيجا ۽ ڀائٽيا ۽ تنهنجي مڙس جو پيءُ تنهنجا محرم آهن، جن کان توکي پردو ناهي ڪرڻو. پر پوءِ به کانئن پردي جو ٿورو ٿڪو خيال ضرور رکڻ گهرجي ۽ نه ئي وري هارسينگار ڪري سندن اڳيان اچجي.