3- گهڻي چرپر نه ڪجي:
حمل جي ڏينهن ۾ عورت کي آرام جي گهڻي ضرورت پوندي آهي، تنهن ڪري کيس ڏکيا ڪم نه ڪرڻ گهرجن. ڳريون شيون کڻڻ، تکو تکو هلڻ ۽ ٽپا ڏيڻ سندس ۽ سندس ٻار لاءِ نهايت هاڃيڪار ٿي سگهن ٿا. ڳورهاري عورت کي ان ڳالهه جو خاص خيال رکڻ گهرجي. مڙس جو به فرض آهي ته زال کي ڳريون شيون کڻڻ نه ڏي ۽ سخت ڪم پاڻ ئي ڪري.
4- حمل جي ڏينهن ۾ ڪي عورتون ٻار ڄڻڻ جي مرحلي کان ڏاڍو ڊڄنديون آهن، خاص ڪري اهي عورتون جيڪي پهريون ڀيرو ٻار ڄڻينديون آهن يا وري جن عورتن جا ٻار غير فطري طريقي سان ڄمندا آهن. ان ڏس ۾ پڻ مڙس کي پنهنجي زال جي مدد ڪرڻ گهرجي ۽ کيس دلجاءِ ڏي ۽ همت ٻڌرائي ۽ چئي ته جيڪڏهن تون پنهنجي صحت جو خيال رکيو ته پوءِ ٻار ڄڻڻ مهل توکي ڪا به تڪليف نه ٿيندي. اهو هڪ فطري عمل آهي جنهن کان عورت کي گذرڻو پوندو آهي ۽ ان کي برداشت ڪرڻ ڏکيو هر گز ناهي. ان تڪليف کان پوءِ توکي هڪ پيارو ٻار ڄمندو جنهن کي ڏسي تنهنجا سمورا ڏک سور ختم ٿي ويندا.
5- ٻار ڄڻڻ جو مرحلو ڏاڍو ڏکيو هوندو آهي تنهن ڪري عورتون ان جي خطرن ۽ نتيجن کان ڏاڍو ڊڄنديون آهن. ٻار ڄڻڻ کان پوءِ اهي ڏاڍو ڪمزور ٿي وينديون آهن. ٻارڙي جي پيدائش جي ڏس ۾ عورت کي نَوَ مهينا ٻار کي پيٽ ۾ رکڻو پوندو آهي ۽ پوءِ وري ٻار ڄڻڻ جهڙي تڪليف ڏيندڙ مرحلي ما ن لنگهڻو پوندو آهي. ٻار کي وجود ۾ آڻن جي ڏس ۾ مڙس جو اصل دخل هوندو آهي. ٻارڙو ماءُ ۽ پيءُ ٻنهي جي ميلاپ سان ئي وجود ۾ ايندو آهي. پر جيئن ته ان وجود جومرڪز ماءُ جي ٻچيداني هوندي آهي، تنهن ڪري مڙس جو اهي اخلاقي، انساني ۽ اسلامي فرض آهي ته ٻار ڄڻڻ جهڙي سخت مرحلي مان لنگهڻ ۾ پنهنجي زال کي دلجاءِ ڏي ۽ پوري پوري ڪوشش ڪري ته جيئن اهو مرحلو خير سان گذري وڃي. جيڪڏهن ڊاڪٽر کي وٺي اچڻ، دوا آڻڻ يا وري کيس اسپتال وٺي وڃڻ جي ضرورت هجي ته هڪدم ائين ڪري ۽ پيار ۽ محبت جي اظهار وسيلي زال کي همٿائي. جڏهن سندس زال اسپتال ۾ هجي ته ان جي لاڳيتي پرگهور لهي ۽ کانئس خبر چار وٺندو رهي ۽ پوءِ جڏهن زال ۽ ٻارڙو گهر اچن ته کين مڪمل سڪون مهيا ڪري. زال کي ڪو به سخت ڪم ڪرڻ نه ڏي ۽ کيس طاقتير شيون کارائي ته جيئن هوءَ پنهنجي وڃايل سگهه وري حاصل ڪري سگهي ۽ اهڙيءَ طرح خوش چڱي ڀلي ٿي ٻارڙي جي پالنا ۽ گهر جي ڪمن ڪارين کي لڳي وڃي.
مڙس جيڪڏهن ائين پنهنجو اسلامي ۽ اخلاقي فرض پورو ڪيو ته پوءِ خدا کيس وڏو اجر ڏيندو . حضور ﷺ جن فرمايو آهي ته، ”توهان مان ڀلو مرد اهو آهي جيڪو پنهنجي زال سان سهڻو ورتاءَ ڪري ۽ مان توهان جي سڀني جي ڀيٽ ۾ پنهنجي زالن سان سٺو ورتاءَ ڪندو آهيان.“
حضرت امام جعفر صادق عه فرمائي ٿو ته، ”الله ان ماڻهوءَ تي رحمت نازل ڪري ٿو جيڪو پنهنجي زال سان سٺا لاڳاپا رکي ٿو ڇو جو الله پاڪ مرد کي اختيار ڏنو آهي ۽ کيس سرپرست بنايو آهي.“
مرد پنهنجي سٺي ورتاءَ وسيلي پنهنجي ڪٽنب ۽ پنهنجي ازدواجي زندگيءَ کي وڌيڪ سگهارو ۽ جٽادار بنائي سگهي ٿو، جڏهن مرد پنهنجي زال سان پيار ۽ محبت سان پيش ايندو ته پوءِ موٽ ۾ هوءَ به ساڻس محبت ڪندي ۽ نهايت شوق ۽ دلچسپيءَ سان گهرگهاٽ جي ڪمن ۽ ڪارين ۾ مشغول رهندي.