جهيڙو جهٽو نه ڪجي:
ڪي عورتون جڏهن مڙس کان ڪاوڙبيون آهن ته ساڻن ڳالهائڻ ٻولهائڻ بند ڪري ڇڏينديون آهن، هر وقت مُنهن سڄايو ويٺيون هونديون آهن، نه ڪو ڪم ڪار ڪنديون آهن ۽ نه وري کين کاڌو پيتو وڻندو آهي. ٻار ڪجهه ڪندا آهن ته پوءِ گهر مٿي تي کڻي ڏينديون آهن. سندن خيال ۾ جهيڙو جهٽو مڙس کان بدلو وٺڻ جو سٺو وسيلو هوندو آهي. ان طريقي سان نه رڳو مڙس سنئين واٽ تي اچي سگهندو پر ان جا ڪيترائي اگرا نتيجا نڪري سگهن ٿا. ٿي سگهي ٿو ته مڙس کي اڃا به ڪاوڙ اچي وڃي ۽ پوءِ توهان جو گهر ڪيترن ئي ڏينهن تائين جنگ جو ميدان بڻيو رهي. جيڪڏهن تون مڙس کي گهٽ وڌ ڳالهائيندينءَ ته هو به ائين ڪندو ۽ تون به نه ڳالهائيندينءَ ته هو به ڳالهاءُ ٻولهاءُ بند ڪري ڇڏيندو. ڪنهن مٽ مائٽ جي چوڻ تي ٺاهه ٿي ويندو پر ٿوري وقت کان پوءِ اهي ئي ساڳيا لاٽون ساڳيا چگهه واري ڪار ٿيندي. يعني سڄي ڄمار ائين جهيڙي ۽ ڇڪتاڻ ۾ گذرندي. نتيجو اهو نڪرندو جو گهر ۾ ڪو سڪون ڪونه هوندو ۽ تنهنجي ٻارڙن جو جيئڻ به جنجال ٿي ويندو. گهڻا تڻا ٻارڙا جيڪي گهرن کان ڀڄندا آهن ۽ قسمين قسمين بڇڙاين ۾ ڦاسي پوندا آهن سي اصل ۾ اهڙن ئي گهرن جا ٻار هونداآهن.
هڪ ڇوڪري ٻڌايو ته منهنجا ماءُ پيءُ ڏهاڙي وڙهندا هئا ۽ انهن مان هڪ ناراض ٿي پنهنجي ڪنهن دوست يا مائٽ جي گهر هليو ويندو آهي. مان پوءِ گهٽين ۾ رلندو وتندو آهيان ۽ ائين مون کي چوريءَ جي عادت پئجي وئي آهي.
هڪ ڏهن سالن جي ڇوڪريءَ سماجي ورڪرن کي ٻڌايو ته، مون کي رڳو ايترو ياد آهي ته هڪ رات منهنجي ماءُ پيءُ ۾ ڏاڍو جهيڙو ٿيو. ٻئي ڏينهن منهنجي ماءُ ڪيڏانهن هلي وئي. ڪجهه ڏينهن کان پوءِ منهنجي پيءُ مونکي پڦيءَ جي حوالي ڪري ڇڏيو، جنهن وري مون کي هڪ پوڙهيءَ کي ڏئي ڇڏيو جيڪا مونکي تهران وٺي آئي. ڪجهه سالن کان مان وٽس رهان پئي پر هن مون کي ڏاڍا عذاب ڏنا آهن.“
ان ڇوڪريءَ جي اسڪول ٽيچر ٻڌايو ته، ”هن سال جڏهن اسڪول کليا ۽ نيون داخلائون ٿيو ته هيءَ ٻارڙي به داخل ٿي. ڪلاس شروع ٿيندي ئي سمورا ٻار پڙهائيءَ ۾ مصروف ٿي ويا پر هي ڇوڪري ڪلاس ۾ ڏاڍو اداس ۽ بي چين هوندي هئي. پڙهائيءَ ۾ کيس ڪا به دلچسپي ڪانه هئي. سدائين بيمارن وانگر ڪنڌ هيٺ ڪيو ڪجهه سوچيندي رهندي هئي. ڪجهه ڏينهن اڳ موڪل کان پوءِ مان کيس ورانڊي جي ڪنڊ ۾ ويٺل ڏٺو. مان کيس چيو ته هاڻي موڪل ٿي وئي آهي سو گهر وڃ. پر هوءَ چپ ڪيو ويٺي رهي. ڪالهه به ائين ئي ٿيو.مان جڏهن کيس ريجهائي گهر نه وڃڻ جو سبب پڇيو ته هن ٻڌايو ته، ”مان هڪ پوڙهيءَ سان رهندي آهيان،. هوءَ مون کي ڏاڍو تنگ ڪندي آهي تنهن ڪري مان گهر وڃڻ نه ٿي چاهيان.“ مان جڏهن کانئس پڇيو ته، ”تنهنجا ماءُ پيءُ ڪٿي آهن ته اهو ٻڌي هوءَ سڏڪا ڀري روئڻ لڳي ۽ پوءِ ٻڌايائين ته اهي ٻئي ڌار ٿي ويا آهن ۽ خبر ناهي ته ڪٿي آهن. مونکي ته هن پوڙهيءَ جي حوالي ڪيو ويو آهي.“
ٿي سگهي ٿو ته تنهنجو مڙس تنهنجي ڪاوڙ جي ڀيٽ ۾ شديد رد عمل ڏيکاري، توکي گهٽ وڌ ڳالهائي ۽ ڌڪ چنبو هڻي. ظاهر آهي ته تون مجبور ٿي پيڪين هلي ويندينءَ ۽ وڃي پيءُ ماءُ کي دانهن ڏيندينءَ. جيڪڏهن اهي به ڳالهه تي ڳنڍ ڏئي بيٺا ته پوءِ معاملو ويتر به خراب ٿي ويندو ۽ ڳالهه وڃي طلاق تي پهچندي. ايئن ٿيو ته پوءِ نه رڳو تنهنجي مڙس جي زندگي تباهه ٿي ويندي پر تون به ان تباهيءَ کان ڪونه بچي سگهندينءَ. مڙس جي ڀيٽ ۾ اڃا به توکي وڌيڪ نقصان پهچندو. الائي جي پوءِ تون ڪهڙن مرحلن مان گذرين ۽ سڄي عمر ائين ئي ڌڪن ٿاٻن ۾ گذري وڃئي.
تنهن ڪري اهي جهيڙا جهٽا نه رڳو اهو ته ڪنهن مسئلي جو حل ناهن پر ويتر به پريشانين ۽ مصيبتن جو ڪارڻ بڻبا آهن.
پياري ڀيڻ! تون به ويڙهه جهيڙ کان پاسو ڪر. جيڪڏهن مڙس جي ڪنهن ڳالهه تي توکي ڪاوڙ آئي آهي ته پوءِ ٿورو صبر ڪر ۽ پوءِ جڏهن توکي سامت اچي ته نهايت نرميءَ سان مڙس کي پنهنجي ڪاوڙ جو سبب ٻڌاءِ.
مثال طور: ”فلاڻي محفل ۾ تون منهنجي توهين ڪئي هئي يا منهنجي فلاڻي ڳالهه ڪونه مڃي هيئي. فلاڻي هنڌتو مون کي هيئن چيو هو. ڇا اهو مناسب آهي ته تون به مونسان اهڙو ورتاءُ ڪرين؟“ اهڙي قسم جي ڳالهه ٻولهه سان تنهنجو مسئلو حل ٿي ويندو ۽ تنهنجي مڙس کي به فهمائش ٿي ويندي. پڪ سان پوءِ هو آئندي ائين نه ڪندو، توکي هڪ وفادار، خوش اخلاق ۽ نيڪ عورت جو رتبو ڏيندو ۽ اهو ئي احساس سندس اخلاق ۽ ڪردار تي سٺو اثر وجهندو.
حضور ﷺ جن فرمايو آهي ته، ”جيڪڏهن ٻه مسلمان پاڻ ۾ ڳالهه ٻولهه بند ڪري ڇڏين ۽ ٽن ڏينهن تائين ٺاهه نه ڪن ته پوءِ اهي اسلام مان نڪري ويندا. انهن مان جيڪو به ٺاهه ڪرڻ ۾ اڳڀرائي ڪندو سو قيامت جي ڏينهن پهرين بهشت ۾ داخل ٿيندو.“