راز سنڀالي رکجن:
عام طور تي عورتن جي اها خواهش هوندي آهي ته پنهنجي مڙس جي رازن کان باخبر رهن. اهي چاهينديون آهن ته روزگار، پگهار، بينڪ بيلنس ۽ سرڪاري ڪمن ڪارين ۽ فيصلن جي کين به خبر هجي. مختصر اهو ته پنهنجي مڙس مان اميد رکنديون آهن ته هو پنهنجا هڙئي راز سندن اڳيان کولي رکي ۽ ڪابه ڳالهه کانئن ڳجهي نه رکي، ان جي ابتڙ ڪيترائي مرد نه چاهيندا آهن ته پنهنجا راز زالن کي ٻڌائين. اهڙيءَ طرح ان ڳالهه جي ڪري شڪ شبها به پيدا ٿينداآهن ۽ زال ۽ مڙس جي وچ ۾ اڻبڻت به ٿي پوندي آهي.
زال شڪايت ڪندي آهي ته منهنجي مڙس کي مون تي ڪوبه ڀروسو ڪونهي، تنهنڪري هو پنهنجا راز مون کي نه ٻڌائيندو آهي ۽ نه ئي وري پنهنجا ڪاغذ ۽ خط پٽ مون کي پڙهڻ ڏيندو آهي، پنهنجي آمدني ۽ بينڪ بيلنس جي باري ۾ به ڪو نه ٻڌائيندو آهي، مان ڪجهه پڇندي آهيانس ته لنوائي ويندو آهي ۽ ڪڏهن ڪڏهن ته ڪوڙ به ڳالهائيندو آهي.
مرد پنهنجا راز زالن کي ان ڪري به نه ٻڌائيندا آهن جو کين اهو عذر هوندو آهي ته عورتن جي دل ۾ ڪا به ڳالهه ٽڪاءُ نه ڪري سگهندي آهي. ڪجهه ٻُڌي هڪدم ٻين کي ڦهلائي ڏينديون آهن. ڪو به ماڻهو کين ريڀي ريجهائي راز پڌرا ڪرائي سگهي ٿو ۽ اهڙيءَ طرح ڪا به مصيبت اچي سگهي ٿي.
جيڪڏهن ڪو ماڻهو ڪنهن جا راز ڄاڻڻ چاهي ته اهو سولائيءَ سان سندس زال کي ڏٽا ڏئي سندس مدد سان پنهنجو مقصد پوري ڪري سگهي ٿو. ڪي عورتون ته وري مڙس جي رازن کي مڙس تي داٻو ڪرڻ لاءِ ڪتب آڻينديون آهن ۽کين اجايو پيون پريشان ڪنديون رهنديون آهن.
مردن جو اهو عذر صحيح آهي ته عورتون راز لڪائي نه سگهنديون آهن. اهو ان ڪري جو عورتون اٻهرائي ڪنديون آهن ۽ سندن احساس ۽ جذبا عقل کي گهٽ ڪري ڇڏيندا آهن. اهي جڏهن ڪاوڙ ۾ هونديون آهن ته پوءِ صبر ۽ سهپ سندن لاءِ ڏاڍو ڏکيو ڪم هوندو آهي. اهڙيءَ مهل ٿي سگهي ٿو ته رازن کي ڄاڻڻ ڪري انهن مان ناجائز فائدو وٺن ۽ مڙس لاءِ مصيبت ڪري ڇڏين.
پڙهندڙؤ! توهان کي به اهڙي قسم جي واقعن ۽ حقيقتن جي ضرور خبر هوندي. تنهنڪري جيڪڏهن عورت چاهي ٿي ته مڙس کانئس ڪوبه راز ڳجهو نه رکي ته پوءِکيس گهرجي ته هوءَ سندس راز ڪنهن کي به نه ٻڌائي، توڙي کڻي مٽ مائٽ هجن يا ٻيا ڪي خير خواهه. ڪنهن کي راز ٻڌائي اهو چوڻ ته ڪنهن ٻئي کي نه ٻڌائجان، تمام وڏي غلطي آهي. توهان جنهن کي پنهنجو رازدار بنايو آهي، تنهن جا پَڪ سان ڪي ويجها دوست هوندا جن کي هو اهو راز ٻڌائي سگهي ٿو ۽ اهڙي طرح اهو راز، راز نه رهندو آهي. سياڻا ماڻهو پنهنجن رازن ۾ ٻئي ڪنهن کي ڀاڱي ڀائيوار نه بنائيندا آهن.
حضرت علي رضه فرمايو آهي ته، ”سياڻي ماڻهوءَ جي دل سندس رازن جي صندوق هوندي آهي.“
حضرت علي رضه ان ڏس ۾ وڌيڪ فرمايو آهي ته، ”دنيا ۽ آخرت جون خوبيون ٻن ڳالهين ۾ لڪل آهن، هڪ راز لڪائڻ ۾ ۽ ٻيو سٺن ماڻهن کي دوست بنائڻ ۾ ۽ سموريون بُرايون ٻن شين ۾ گڏ ٿيل آهن، هڪ ته راز کولڻ ۾ ۽ ٻيو بڇڙن ماڻهن سان دوستي ڳنڍڻ ۾.