هيٺيون واقعو پڙهو:
هڪ ماڻهوءَ پنهنجو پاڻ کي، پنهنجي زال ۽ ماٽيجي ڌيءَ کي گولي هڻي ماري وڌو. شاديءَ کان پوءِ شروع کان ئي ٻنهي زال مڙسن جي پاڻ ۾ ڪونه لڳندي هئي تنهن ڪري صبح شام جهيڙو ڪرڻ سندن معمول ٿي چڪو هو. هڪ ڏينهن مڙس ڪم تان واپس گهر آيو ته ڏاڍي ڪاوڙ ۾ هيو. ڪنهن ڳالهه تان ٻنهي ۾ جهيڙو شروع ٿي ويو. مڙس زال کي ڏاڍو ماريو. سندس زال پوليس کي اطلاع ڪرڻ پئي چاهيو پر ان کان اڳ هن زال ۽ ماٽيجي ڌيءَ کي ماري ڇڏيو ۽ پوءِ پاڻ کي به گولي هڻي ختم ڪري ڇڏيائين.
ڇا ائين چڱو نه ٿيندو ته زال مڙس کي ڪاوڙ ۾ ڏسي ڪجهه گهڙين لاءِ صبر ڪري ويهي، پنهنجو رد عمل نه ڏيکاري ۽ پنهجي ان عمل وسيلي پنهنجي ازدواجي ڳانڍاپي کي ڇڄڻ کان بچائي؟ ڪجهه گهڙين جو صبر ڏکيو آهي يا مسئلن ۽ پريشانين کي مُنهن ڏيڻ؟ متان اهو سوچيو ته مان مردن جي بچاءُ ٿو ڪريان يا کين بي ڏوهي ٿو سمجهان. منهنجو اهو مقصد هرگز ناهي. ان ڏس ۾ مرد به قصور وار ضرور آهي. کيس ٻين جي ڪاوڙ پنهنجي گهروارن تي نه لاهڻ گهرجي. ڪتاب جي ٻئي ڀاڱي ۾ ان موضوع تي تفصيل سان بحث ٿيل آهي. منهنجي چوڻ جو مقصد رڳو اهو آهي ته جڏهن مرد ڪاوڙ ۾ هجي ته پوءِ سندس زال کي گهرجي ته هوءَ صبر ۽ سهپ کان ڪم وٺي حالتن جي نزاڪت جو ڪاٿو لڳائي ۽ ازدواجي زندگيءَ جي مقدس ٻنڌڻ کي ٽٽڻ کان بچائي وٺي.
عام ڪري عورتون اهو سمجهنديون آهن ته جيڪڏهن هنن مڙس جي ڪاوڙ جي ڀيٽ ۾ ماٺ ڪئي ته پوءِ سندن حيثيت ۽ رتبي ۾ گهٽتائي اچي ويندي ۽ اهي ذليل ۽ خوار ٿي پونديون. ائين بنهه ناهي. جيڪڏهن مرد ڪاوڙ جي حالت ۾ زال کي بيعزتو ڪري ٿو ۽ کيس گهٽ وڌ ڳالهائي ٿو ۽ زال کيس ڪا به ورندي نه ٿي ڏئي ته بعد ۾ مڙس (جيڪڏهن منجهس انسانيت آهي ته) پڪ سان شرمندو ٿيندو ۽ زال جي خاموشيءَ کي هڪ قسم جو ايثار ۽ ادب سمجهندو ۽ اهڙيءَ طرح سندس محبت ۾ واڌ اچي ويندي. جڏهن سندس ڪاوڙ ٿڌي ٿي ويندي ۽ هو پنهنجي اصلي حالت ۾ اچي ويندو ته سوچيندو ته مان پنهنجي زال جي توهين ڪئي آهي، جڏهن ته هوءَ به ائين ڪري سگهي پئي پر هن صبر کان ڪم ورتو ۽ خاموش رهي، هوءَ سياڻي زال آهي ۽ مون سان محبت ڪري ٿي.“ اهڙيءَ صورت ۾ هو پنهنجي ڪئي تي پڇتائيندو، کيس ضمير به ڇينڀيندو ۽ پوءِ هو زال کان معافي وٺڻ تي مجبور ٿيندو. تنهن ڪري هڪ وفادار ۽ سياڻي عورت پنهنجي سياڻپ ۽ سهپ واري عمل ڪري نه رڳو اهو ته گهٽجي ڪونه ويندي پر پنهنجي مڙس ۽ ٻين جي نظرن ۾ پڻ سندس عزت وڌي ويندي.
حضور ﷺ جن فرمايو آهي ته، ” جيڪا عورت پنهنجي مڙس جي بداخلاقيءَ جي ڀيٽ ۾ صبر ۽ بردباريءَ کان ڪم وٺي ٿي تنهن کي الله پاڪ حضرت آسيه جيترو ثواب ڏيندو.“
پاڻ سڳورن ﷺ اهو به فرمايو آهي ته، ”توهان مان ڀلي عورت اها آهي جيڪا جڏهن مڙس کي ڪاوڙيل ڏسي ته چئي ته، ”مان تنهنجي مرضيءَ آڏو ڪنڌ جهڪايان ٿي ۽ جيستائين تون راضي نه ٿيندين تيستائين ننڊ منهنجي اکين کان ڪوهين پري هوندي.“
هڪ ٻئي موقعي تي حضور ﷺ جن فرمايو ته، ”معاف ڪري ڇڏڻ ماڻهوءَ جي عزت ۽ بزرگيءَ ۾ واڌارو ڪندو آهي. پاڻ ۾ معاف ڪرڻ جي عادت وجهو ته جيئن خدا پاڪ توهان کي ويجهو رکي.“