گهر جي ڪم ڪار ۾ زال جو هٿ ونڊائڻ گهرجي:
اهو صحيح آهي ته گهر جي مڙني ڪمن ڪارين جي ذميداري عورتن مٿان هوندي آهي پر حقيقت ۾ اها ذميداري نڀائڻ ڏاڍي هوندي آهي. گهر جو ڪم ڪار ايڏو ته گهڻو هوندو آهي جو هڪ گهريلو عورت صبح کان شام تائين هڻ هڻان پئي ڪندي آهي، پر تنهن هوندي به ڪيترائي ڪم کانئس رهجي ويندا آهن. گهر ۾ جڏهن مهمان ايندا آهن ته پو ءِ ته ڪمن جو بار ويچاريءَ کي ٿڪائي ڇڏيندو آهي.
گهر جي ڪمن ڪارين کان زال ويچاري لنوائڻ جو ته سوچي ئي نه ٿي سگهي پر هوءَ مڙس مان اها اميد ضرور رکندي آهي ته هو ڪڏهن ڪڏهن سندس هٿ ونڊائي.
جڏهن مرد گهر ۾ اچي ۽ ڏسي ته سندس زال گهر جي ڪمن ۾ ڦاٿل آهي ته پوءِ کيس اهو ڪونه ٿو سونهين ته پاڻ وڃي لَت ڏئي سمهي پئي يا ان ڳالهه جو انتظار ڪري ته سندس زال هڪدم چانهه پاڻي کڻي وٽس ايندي. محبت ۽ انسانيت جي اها تقاضا آهي ته اهڙي موقعي تي هو زال جي مدد ڪري ۽ کانئس جيڪو ڪجهه پُڄي سگهي سو ڪري. گهر ۾ آرام سان ويهي حڪم هلائڻ، اعتراض ۽ روڪ ٽوڪ ڪرڻ مڙسي ٿوروئي آهي.
گهر ڪو ڪمانڊ هيڊڪوارٽر ناهي جتان رڳو حڪم جاري ڪجن پر گهر محبت ۽خلوص جو مرڪز آهي . اهو هرگز نه سوچيو ته جيڪڏهن مان گهر جو ڪم ڪندس ته منهنجي عزت گهٽجي ويندي ۽ منهنجو رعب ۽ داٻو پڻ گهٽ ٿي ويندو . اهو خيال صفا غلط آهي ۽ توهان جي اهڙي هلت توهان کي پنهنجي زال جي نظرن ۾ ڪيرائڻ جو ڪارڻ پڻ بنجي سگهي ٿي .سٺو آهي ته توهان گهر جي ڪمن ڪارين ۾ زال جو هٿ ونڊايو . ائين ڪرڻ سان نه رڳو زال جي دل ۾ توهان جي لاءِ عزت ۽ محبت وڌي ويندي پر ٻيا ماڻهو به توهان کي هڪ مهربان ۽ هڏ ڏوکي ماڻهو سمجهندا .
حضور ﷺ جن پنهنجي ايڏي عظمت،بزرگي ۽ اعليٰ رتبي جي باوجود به گهر ۾ ڪم ڪار ڪندا هئا.
ام المؤمنين حضرت عائشه رضه فرمائي ٿي ته، ”جڏهن پاڻ سڳورنﷺ کي واندڪائي هوندي هئي ته پنهنجا ڪپڙا پاڻ سبندا هئا،پنهنجي جُتي پاڻ ڳنڍيندا هئا ۽ ٻين عام مردن وانگر گهر جو ڪم ڪار ڪندا هئا.“