گهر داري يا سگهڙائپ:
”گهر“ هونئن ته هڪ ننڍڙي چارديواريءَ جونالو آهي پر اها هڪ اهڙي نعمت آهي جنهن جا اڻ ڳڻيا فائدا آهن. جنهن وقت ماڻهو زور جي ڪمن ڪارين ۽ گوڙ گهمسان کان ٿڪجي پوندو آهي ته اچي گهر ۾ پناهه وٺندو آهي، جڏهن زندگيءَ جي لاهن چاڙهن ۽ ڇڪتاڻ کان گهٻرائجي ويندو آهي، ته آرام ڪرڻ لاءِ گهر ۾ ئي ايندو آهي ۽ ايستائين جو جڏهن سير تفريح کان ٿڪجي پوندو آهي ته گهر ۾ ئي اچي اجهو وٺندو آهي. جي ها! گهر، هڪ اهڙي پناهه گاهه آهي جتي ماڻهو بنا قيد بند ۽ خوف جي دلجاءِ سان آرام ڪندو آهي. گهر پيار ۽ محبت جومرڪز آهي، نيڪ ۽ فضيلت ڀرين مردن ۽ عورتن جي پرورش گاهه آهي ۽ ٻارڙن جي تعليم ۽ تربيت جو مرڪز ۽ سندن شخصيت ۽ ڪردار جي تعمير گاهه آهي. گهر هڪ اهڙو ننڍڙو معاشرو آهي جنهن جي وسيلي انسانن جي هڪ وڏي معاشري جي جوڙ جڪ ٿيندي آهي.
وڏي معاشري جي ترقي ۽ تباهي ۽ چڱائي ۽ برائي ان ننڍڙي معاشري سان ڳنڍيل آهي. اهو ننڍڙو ڪٽنبي معاشرو جيتوڻيڪ وڏي معاشري جو هڪ جزو هوندو آهي، پر ڪنهن حد تائين ذاتي آزادي بخشيندڙ هوندو آهي. تنهنڪري اهو چوڻ صحيح رهندو ته جيڪڏهن سماج جو سڌارو ڪرڻو آهي ته پوءِ ان جي شروعات ڪٽنب کان ڪرڻ گهرجي.
زندگيءَ جي ان مکيه بنياد ۽ سماج جي ان وڏي تعليم ۽ تربيت گاهه کي هلائڻ جي ذميداري عورتن تي هوندي آهي يعني سماج جي ترقيءَ ۽ تباهي ۽ چڱائي ۽ برائيءَ جو دارومدار عورتن جي ارادي ۽ وس ۾ آهي. اهوئي سبب آهي جو گهرداري کي نهايت مانائتو شغل سڏيو ويو آهي. جيڪي ماڻهو گهر جي ماحول کي اهميت نه ٿا ڏين ۽ گهرداريءَ جي شريفاڻي ڪم کي عيب سمجهن ٿا تن کي اصل ۾ گهرداريءَ جي حقيقي معنيٰ ۽ ان جي مٿانيهن قدر ۽ اهميت جا ڪا خبر ڪانهي.
هڪ گهردار عورت کي فخر هجڻ گهرجي ته کيس هڪ اهم ۽ نازڪ ذميداري سونپي وئي آهي، تنهن ڪري هاڻي پنهنجي قوم ۽ ملت جي ترقي ۽ آسودگيءَ لاءِ ايثار ۽قربانيءَ کان ڪم وٺي. پڙهيل لکيل عورتن جي ان ڏس ۾ ذميداري اڃان به وڌيڪ آهي. کين گهرجي ته ٻين جي لاءِ پاڻ کي نمونو بنائين ته جيئن اهي کانئن گهرداريءَ ۽ سگهڙائپ جا طور طريقا ۽ اصول سکن. گڏوگڏ اهي عملي طور تي اهو ثابت ڪري ڏيکارين ته پڙهيل لکيل هجڻ سان نه رڳو اهو ته سندن گهرداريءَ تي ڪو اثر نه ٿو پوي پر پڙهيل لکيل هجڻ ڪري سندن زندگي به سٺي نموني گذري ٿي.
هڪ پڙهيل لکيل عورت کي گهرجي ته زندگيءَ جي معاملن کي سٺي نموني مُنهن ڏي ۽ گهرداريءَ جهڙي مانائتي شغل کي پنهنجي لاءِ عزت ڀريو سمجهي ۽ پنهنجي هلت وسيلي پڙهيل لکيل عورتن جي لياقت ۽ مٿرائپ کي ثابت ڪري ڏيکاري، نه ڪي اهو ته پڙهيل لکيل هجڻ جو بهانو ڪري ڪنهن ڪم کي هٿ به نه لڳائي ۽ اهڙيءَ طرح پڙهيل لکيل عورتن کي مفت ۾ بدنام ڪندي وتي. تعليم حاصل ڪرڻ جو مطلب اجايو گهمڻ گهتڻ ۽ ذميدارين کان آجو رهڻ ناهي پر پنهنجي ذميدارين کي سهڻي نموني نڀائي ٻين عورتن لاءِ مثال قائم ڪرڻ آهي.