گهر ۾ به هار سينگار ڪجن ۽ صاف سٿرو رهجي:
گهڻين عورتن جي اها عادت هوندي آهي ته اهي جڏهن ڪنهن شاديءَ يا دعوت ۾ وينديون آهن ته سٺا ويس وڳا پائي ۽ هار سينگار ڪري گهران نڪرنديون آهن، پر جڏهن گهر موٽنديون آهن ته هڪدم سٺا ۽ خوبصورت ڪپڙا لاهي معمولي ۽ پراڻا ڪپرا پائي ڇڏينديون آهن. اهي گهر ۾ نه ته صاف سٿرو رهنديون آهن ۽ نه ئي وري هار سينگار ڪنديون آهن. حالانڪه عورت کي گهرجي ته گهر ۾ پنهنجي مڙس لاءِ هار سينگار ۽ ٺاهه جوڙ ڪن ڇو جو مڙس ئي سندس زندگيءَ جو ساٿي ۽ هڏ ڏوکي آهي. اهي مڙس سان ئي ناز انداز ڪن ته جيئن ٻيو ڪو سندس دل ۾ جاءِ والاري نه سگهي. ڀلا مڙس کان سواءِ ٻين جي ڪهڙي اهميت آهي جو انهن لاءِ هار سينگار ڪجي ۽ ويس وڳا پائجن؟ ڇا اها ڏک جهڙي ڳالهه ناهي جو عورت ڌارين جو پاڻ ڏانهن ڌيان ڇڪائڻ جي لاءِ ٺاهه جوڙ ڪري؟
حضور ﷺ جن فرمايو آهي ته، ”جيڪا عورت خوشبوءِ هڻي ٻاهر ويندي آهي ۽ جيستائين گهر موٽي نه ايندي آهي تيستائين خدا جي ٻاجهه کان پري رهندي آهي.“
حضور ﷺ جن اهو پڻ فرمايو آهي ته، ”توهان مان سٺي عورت اها آهي جيڪا پنهنجي مڙس جي فرمانبرداري هجي، سندس لاءِ هارسينگار ڪري، نه ڪي هارسينگار ڌارين تي ظاهر ڪري ۽ توهان مان خراب عورت اها آهي جيڪا پنهنجي مڙس جي پرپٺ سينگار ڪري.“
ڀيڻ! هڪ مرد جي دل کي قابو ڪري رکڻ ڪو سولو ڪم ٿوروئي آهي. اهو نه چؤ ته منهنجو مڙس مون کي چاهي ٿو تنهن ڪري ضروري ناهي ته مان هر وقت سندس اڳيان ٺَهي جُڙي بيٺي هجان ۽ کيس ناز انداز ڪري ڏيکاريان.
پَڪ ڄاڻ ته تنهنجي مڙس جي اها خواهش هوندي آهي ته تون سندس اڳيان سينگاريل ۽ صاف سٿري رهين. جيڪڏهن تون سندس دلي خواهش پوري نه ڪندينءَ ته پوءِ هو ٿي سگهي ٿو ته گهر کان ٻاهر صاف سٿرين ۽ هاريل سينگاريل عورتن تي نظر وجهي ۽ سندس دل توکان کڄي وڃي ۽ پوءِ هو ڀٽڪي وڃي. ان لاءِ ضروري آهي ته تون سدائين گهر ۾ صاف سٿري رهه، هار سينگار ڪر، سٺا ويس وڳا پاءِ ۽ ناز انداز ڏيکار ته جيئن هو ڀٽڪڻ کان بچي وڃي. ائين ڪندينءَ ته پوءِ مڙس توسان محبت ڪندو ۽ تون سدائين لاءِ سندس دل تي حڪومت هلائيندي رهندينءَ.
ڀيڻ! شايد تنهنجي خيال ۾، ”گهر اندر گهر، ٻارڙن ۽ رڌڻي جي ڪمن ڪارين ڪرڻ مهل هاريو سينگاريو رهڻ ڪيئن ممڪن آهي؟ پر جيڪڏهن توکي هارسينگار جي قدر جو پتو هجي ته پوءِ تون ان ننڍڙي مسئلي کي سولائيءَ سان حل ڪري سگهين ٿي. اهو هيئن ته گهر جا ڪم ڪرڻ لاءِ هڪ ڌار وڳو سبراءِ جنهن کي رڳو ڪم ڪرڻ مهل ڪتب آڻ. پوءِ جڏهن ڪم مان واندي ٿي وڃين ۽ تنهنجي مڙس جي اچڻ جو وقت ٿي وڃي ته پوءِ سٺو وڳو پاءِ، وارن کي سنوار ۽ هار سينگار ڪري مڙس جي اچڻ جو اوسيئڙو ڪر.