بيماريءَ ۾ مڙس جو خيال رکڻ گهرجي:
ڏک ۽ بيماريءَ وقت ماڻهوءَ کي سارسنڀال لهڻ واري ۽ غمخوار جي ضرورت پوندي آهي ۽ سندس دل چاهيندي آهي ته ساڻس ڪو همدردي ڪري، کيس دلجاءِ ڏي ۽ تسليءَ وسيلي سندس ذهن کي سڪون پهچائي. اهڙي وقت سندس زال ئي ائين ڪري سگهي ٿي. مرد جڏهن ڪنهن عورت سان شاديءَ وسيلي سڄي عمر جو ڳانڍاپو ڳنڍيو آهي ته پوءِ هو زال مان اها اميد رکندو آهي ته هوءَ پريشانيءَ ۽ بيماريءَ مهل سندس پرگهور لهي ۽ کيس دلجاءِ ڏي ۽ همٿائي.
ڀيڻ! جيڪڏهن تنهنجو مڙس بيمار ٿي پيو آهي ته پوءِ تون سندس پهرين کان به وڌيڪ خيال رک، ساڻس همدردي ڪر ۽ کيس دلجاءِ ڏي. جيڪڏهن ڊاڪٽر جي ضرورت پوي ته هڪدم کيس گهرائي وَٺ ۽ دوا جي گُهرج هجي ته اها به هڪدم گُهراءِ، بيمار کي جيڪو کاڌو وڻي سو کيس ٺاهي ڏي، بار بار سندس طبيعت پُڇ ۽ کيس تسلي ڏي ۽ گهڻي کان گهڻو وقت وٽس ويهه. جيڪڏهن تڪليف جي ڪري کيس ننڊ نه ٿي اچي ته پوءِ تون به جاڳندي رهه. ڏينهن جو سندس ڪمري ڀرسان ٻارن جو گوڙ گهمسان نه ٿيڻ ڏجي ته جيئن سندس آرام ۾ خلل نه پئي. تون جيڪڏهن وٽس بار بار ويندينءَ ۽ خيال ڪندينءَ ته پوءِ تنهنجي اها مهرباني سندس تڪليف گهٽائڻ جو سبب بڻبي ۽ پڻ کيس خوش چڱو ڀلو ٿيڻ ۾ مدد ڏيندي. ان کان سواءِ اهڙي قسم جو ڪم وفاداري ۽ سچي محبت جي نشاني سمجهيو ويندو آهي ۽ ان جي نتيجي ۾ زندگيءَ ۾ همٿ پيدا ٿيندي آهي۽ هڪٻئي سان محبت ۾ واڌارو ٿيندو آهي. پوءِ جيڪڏهن تون به بيمار ٿيندينءَ ته هو به توسان اهڙو ئي سٺو ورتاءُ ڪندو ۽ تنهنجي لاءِ تڪليفون سهندو.
حضور ﷺ جن فرمايو آهي ته، ”عورت جو جهاد اهو آهي ته هوءَ مڙس جي چڱيءَ ريت سار سنڀال لهي.“