رڳو پنهنجي مڙس تي ڌيان ڏج:
ڀيڻ! ٿي سگهي ٿو ته تنهنجي شاديءَ کان اڳ ڪي ماڻهو تنهنجي رشتي لاءِ آيا هجن. ايئن به ٿي سگهي ٿو ته ڪو ماڻهو تنهنجي نظرن ۾ به هجي جنهن سان تون شادي ڪرڻ چاهيندي هجين يا تنهنجي اها خواهش هجي ته جيڪر تنهنجو مڙس آسودو هجي، فلاڻي نوڪري ڪندو هجي، انجنيئر هجي يا ڊاڪٽر هجي ۽ سهڻو ۽ سمارٽ پڻ هجي. شاديءَ کان اڳ اهڙي قسم جي خواهش ڪرڻ ڪا خراب ڳالهه ڪانهي. پر جيئن ته هاڻي تون هڪ مرد کي پنهنجي زندگيءَ جو ساٿي بنائي آخري عمر تائين ساٿ نڀائڻ جو واعدو ڪري چڪين آهين ته پوءِ گذريل ڳالهين کي صفا وساري ڇڏ. اهي خواهشون جيڪي پوريون نه ٿي سگهيون ۽ اهي سپنا جيڪي ساڀيا ماڻي نه سگهيا تن جو دل ۾ خيال به نه آڻ. پنهنجي مڙس کان سواءِ هر مرد لاءِ پنهنجو اکيون ٻوٽي ڇڏ ۽ پنهنجي دل کي بي چينيءَ ۽ پريشانيءَ کان ڇو ٽڪارو ڏيار. پنهنجي مڙس کان سواءِ هر غير مرد جي خيال کي دل مان ڪڍي ڇڏ ۽ پنهنجو سمورو ڌيان رڳو پنهنجي مڙس تي ڏي. پنهنجي اڳوڻي طلبگار کي وساري ڇڏ ۽ سندس لاءِ ڀُلجي به نه سوچ. اهو پريشان آهي يا نه، تنهن ۾ تنهنجو ڇا؟ توکي سندس باري ۾ ڄاڻڻ جي ڳڻتي ڇو لڳل آهي؟ ائين ڪندينءَ ته پوءِ پريشانيءَ کان سواءِ ٻيو ڪجهه به ڪونه ملندئي!
هاڻي جيئن ته تون هڪ مرد سان شاديءَ جو ٻنڌڻ ٻڌي ڇڏيو آهي ته پوءِ آخر ائين ڇو؟ ان مرد سان پنهنجي مڙس جي ڀيٽ ڇو ٿي ڪرين؟ ائين ڪرڻ سان توکي پريشانيءَ ۽ لاڳيتي بي آراميءَ کان سواءِ ڪجهه ڪونه پلئه پوندو.
جڏهن تون ٻين مردن کي ڏسي پنهنجي مڙس جي ساڻن ڀيٽ ڪندي آهين ته پوءِ توکي ڪي اهڙا مرد به نظر ايندا هوندا جن ۾ اهي عيب نه هوندا جيڪي تنهنجي مڙ س ۾ آهن، پر ڇا تون اهو سمجهين ٿي ته اهي سڀ عيبن کان آجا هوندا؟ ڇا اهي آسمان کان لٿا آهن؟ ٿي سگهي ٿو ته منجهن ڪي اهڙا عيب به هجن جن جي توکي ڪا خبر ئي نه هجي. جيئن ته انهن جا عيب توکان لڪل آهن ۽ توکي رڳو سندن خوبين جي خبر آهي تنهنڪري تون پاڻ کي بدقسمت ٿي ڪوٺين ۽ اهو ٿي سوچين ته هن مرد سان شادي ڪري تو پاڻ سان ويل وهايو آهي. تنهنجي اهڙي سوچ توکي نڀاڳ ۽ تباهيءَ جي ڪنڌيءَ تي پهچائي سگهي ٿي.
هڪ ارڙهن سالن جي پرڻيل عورت گهر کان ڀڄي وئي. ڪجهه عرصي کان پوءِ پوليس کيس پڪڙي ورتو. هن پوليس کي بيان ڏيندي چيو ته، ”ٽي سال اڳ فلاڻي شخص سان منهنجو نڪاح ٿيو هو پر مون کي جلد ئي اهو احساس ٿيو ته اهو مون کي نٿو وڻي. پنهنجي مڙس جي چهري جي ٻين مردن جي چهري سان ڀيٽ ڪندي هيس ۽ پڇتائيندي هيس ته آخر مان هن مرد جي زال ڇو ٿيس؟“
ڀيڻ! جيڪڏهن تون چاهين ٿي ته نڀاڳ تو وٽ نه اچي، ذهني پريشانين کا بچيل ۽ خوش ۽ مطمئن زندگي گذارين ته پوءِ اجاين خواهشن کان پنهنجو دامن آجو ڪر. پنهنجي مڙس کان سواءِ ٻين سڀني کي وساري ڇڏ. ٻين مردن جي واکاڻ بنهه نه ڪر ۽ نه ئي وري سندن خيال دل ۾ آڻ. ائين به نه سوچ ته جيڪر فلاڻي ماڻهوءَ سان منهنجي شادي ٿئي ها، جيڪر منهنجي مڙس جو فلاڻو ڌنڌو هجي ها ۽ هو هيئن هجي يا هونئن هجي ها وغيره.
ڇا تون ڪڏهن سوچيو آهي ته تنهنجي انهن اڻ پورين خواهشن ۽ غلط سوچ جو ڪهڙو نتيجو نڪرندو؟ ڇو پنهنجي ۽ پنهنجي مڙس جي زندگيءَ کي زهر ٿي بڻائين؟ ڇو پنهنجي ازدواجي زندگيءَ جي بنيادن کي لوڏي رهي آهين؟ ڇا توکي اها پڪ آهي ته جيڪڏهن تنهنجي فلاڻي مرد سان شادي ٿئي ها ته تون سؤ سيڪڙو خوش رهي سگهين ها؟ تون ته ان مرد جي ظاهري وصفن کان سواءِ ٻيو ڪجهه ڪين ٿي ڄاڻين. ڇا توکي اها خبر آهي ته ان مرد جي زال ساڻس خوش پئي گذاري؟
ڀيڻ! جيڪڏهن تنهنجي مڙس کي ٿوري به کُڙڪ پئجي وڃي ته تون ٻئي ڪنهن مرد کي چاهين ٿي ته پوءِ اهو توتي شڪ ڪرڻ لڳندو، سندس پيار ۽ محبت ۾ گهٽتائي اچي ويندي ۽ هو گهر گهاٽ ۽ ڪٽنب مان دلچسپي ختم ڪري ڇڏيندو. تنهن ڪري اهو توتي لازم آهي ته تون ٻين مردن جي واکاڻ هرگز نه ڪر ۽ نه ئي منجهن دلچسپي وٺ. مرد ايڏو ته حساس هوندو آهي جو هو اها ڳالهه بنهه برداشت ناهي ڪري سگهندو ته سندس زال غير مرد ته ٺهيو پر ان جي تصوير ۾ به دلچسپيءَ جو اظهار ڪري.
پاڻ سڳورن ﷺ جن فرمايو آهي ته، ”جيڪا عورت پنهنجي مڙس کان سواءِ ڪنهن غير مرد کي لالچي نظرن سان ڏسندي ته اها الله پاڪ جي قهر کان ڪونه بچي سگهندي.“