گهر ۾ به صاف سٿرو رهجي:
صفائي سٿيرائيءَ جو خيال رکڻ هر هڪ لاءِ ۽ هر هنڌ ضروري آهي. ماڻهوءَ کي گهرجي ته هو پنهنجو بدن ۽ لباس صاف سٿرو رکي، روزانو وهنجي، ڏينهن ۾ ٻه- ٽي ڀيرا صابڻ سان هَٿ مُنهن ڌوئي، صبح جو ۽ رات جو سمهڻ مهل ڏندڻ يا بُرش ڪري، وارن کي ڦڻي ڏي، مٿي ۽ ڏاڙهيءَ جا وار ٺاهي، صاف بُوٽ پائي ۽ پنهنجي مالي سگهه مطابق صاف سٿرو لباس وڳا پائي.
اسلام ۾ صاف سٿري رهڻ ۽ صفائيءَ تي تمام گهڻو زور ڏنو ويو آهي. حضور ﷺ جن فرمايو آهي ته، ”صفائي اڌ ايمان آهي.“
پاڻ سڳورن ﷺ هڪ ماڻهوءَ کي وکريل وارن ۽ گنديءَ حالت ۾ ڏسندي فرمايو، ”خدا جي نعمتن مان فائدو وٺڻ ايمان جو جائزو آهي.“
حضور ﷺ جن فرمايو آهي ته، ” گندو ماڻهو، بڇڙو ماڻهو هوندو آهي.“
پاڻ ﷺ جن اهو به فرمايو آهي ته، ”جبرائيل مون کي ڏندڻ هڻڻ لاءِ ايڏو زور ڀريو جو مون کي پنهنجي ڏندن جي ڏاڍي ڳڻتي رهندي آهي.“
حضرت علي رضه فرمايو آهي ته، ”خدا پاڻ خوبصورت آهي ۽ خوبصورتيءَ کي پسند ڪندو آهي ۽ پنهنجي نعمتن جا نشان پنهنجي ٻانهن ۾ ڏسڻ چاهيندو آهي.“
صفائي سٿرائي ۽ خوبصورتي رڳو عروتن لاءِ ناهي پر مردن کي به پاڻ کي ٺيڪ ٺاڪ رکڻ ۽ صاف سٿرو رهڻ گهرجي. ڪيترائي مرد پنهنجي لٽي ڪپڙي ۽ صفائيءَ تي ڪو ڌيان ڪونه ڏيندا آهن، مهيني ماسين ويهجندا آهن. مٿي ۽ ڏاڙهيءَ جا وار وڌڻ جي کين ڪا ڳڻتي ناهي هوندي، ميرن ڪپڙن ۾ ۽ گندن وارن سان ٻاهر پيا گهمندا ڦرندا رهندا آهن ۽ سندن پگهر ۽ پيرن جي ڌپ کان ماڻهوءَ ونءُ پيا ويندا آهن. ان جي ابتڙ ڪي مرد وري صاف سٿرو رهڻ، سٺا ڪپڙا پائڻ ۽ هار سينگار ڪرڻ جا شوقين هوندا آهن پر سندسن اهو شوق گهر کان ٻاهر ئي هوندو آهي پر گهر ۾ انهن ڳالهين تي ڪوبه ڌيان ڪونه ڏيندا آهن. جڏهن آفيس، بازار يا ڪنهن وهانءُ شاديءَ ۾ وينداآهن ته ٺهي جُڙي ۽ سٺا ڪم ڪپڙا پائي گهران نڪرندا آهن پر جڏهن گهر موٽي ايندا آهن ته اهي ڪپڙا لاهي ڪو ميرو سيرو وڳو پائي ڇڏيندا آهن. صبح جو اُٿندا آهن ته مُنهن تي پاڻيءَ جا ٻه ڇنڊا هڻڻ جي به تڪليف نه ڪندا آهن ۽ چپن ۾ ٿڦيل اکين سان ئي نيرن ڪرڻ ويهجي ويندا آهن. اتفاق سان جيڪڏهن ڏينهن ۾ گهران نڪرڻ نه ٿيندو اٿن ته پوءِ ان ئي گندي حالت ۾ رهندا آهن ۽ چوندا آهن ته گهر ۾ ويٺا آهيون، ڪو ڏسندو ٿوروئي! سندن خيال ۾ صفائي سٿرائي ۽ هارسينگار رڳو گهر کان ٻاهر ۽ ٻين ماڻهن کي ڏيکارڻ لاءِ ڪيو ويندو آهي.
پيارا ڀاءُ! جهڙيءَ ريت ميرن ۽ بدبودار ڪپڙن ۾ توهان کي پنهنجي زال سٺي نه لڳندي آهي ۽ توهان چاهيندا آهيو ته هوءَ گهر ۾ صاف سُٿري ۽ اڇي اجري رهي. تيئن هوءَ به اوهان مان اها ئي اميد رکندي آهي، کيس به گندو ۽ گدلو مڙس ڪونه وڻندو آهي. هوءَ به چاهيندي آهي ته سندس مڙس سدائين صاف سٿرو ۽ سمارٽ ۽ وڻندڙ نظر اچي.
جيڪڏهن توهان گهر ۾ ڪرڀ ڏياريندڙ شڪل صورت بنايو ويٺا هوندا ۽ توهان جي زال ٻاهر سمارٽ ۽ صاف سٿرن مردن کي ڏسندي ته سوچيندي ته اهي شايد ڪنهن ٻي دنيا کان آيا آهن. جڏهن انهن جي توهان سان ڀيٽ ڪندي ته کيس ضرور صدمون پهچندو. تنهن ڪري توهان گهر ۾ اڇا اُجرا لڳا ويٺا هجو ته جيئن توهان جي زال سمجهي ته توهان به ٻين کان گهٽ ناهيو. ان سان سندس محبت ۾ واڌ ايندي، سندس دل خوش رهندي ۽ گهر ۾ گهڻي دلچسپي وٺڻ لڳندي. ڀلارڳو ڌارين عورتن ۽ مردن لاءِ هار سينگار ڪرڻ ۽ ويس وڳا پائڻ مان اوهان کي ڪهڙو پَٽڪو ملندو؟ توهان جو ساڻن ڇا وڃي؟ هارسينگار ته توهان کي پنهنجي زال لاءِ ڪرڻ گهرجن ڇو جو هوءَ ئي توهانجي زندگيءَ جي ساٿياڻي آهي. توهان کي جيڪڏهن سندس محبت کپي ته پوءِ سدائين اڇا اجرا رهو. پَڪ ڄاڻو ته اها ڳالهه توهان جي فائدي جي آهي.
اسان جي دين اسلام ۾ مردن کي هدايت ڪئي وئي آهي ته اهي پنهنجي زالن لا ءِ هارسينگار ڪن.
حضور ﷺ جن فرمايو آهي ته، ” مرد تي واجب آهي ته هو پنهنجي زال جي کاڌ خوراڪ ۽ لٽي ڪپڙي جو بندوبست ڪري ۽ بڇڙي شڪل صورت ۾ سندس آڏو نه اچي. جيڪڏهن هن ائين ڪيو ته پوءِ ڄڻ پنهنجي زال جو حق ادا ڪري ڇڏيو.“
پاڻ ﷺ جن وڌيڪ فرمايو آهي ته، ”مردن کي گهرجي ته پنهنجي زالن اڳيان سٺي شڪل صورت ۾ رهن، ائين جيئن پاڻ چاهيندا آهن ته سندن زالون سندن لاءِ سنواريل هجن ڪن.“
اما رضا عه فرمايو آهي ته، ”بني اسرائيل جون عورتون ان ڪري پنهنجي پاڪائي ۽ عزت وڃائي ويٺيون جو سندن مرد ڍنگ سان نه رهندا هئا ۽ خوبصورتيءَ جو ڪو به خيال نه رکندا هئا.“ وڌيڪ فرمايائون ته، ”جنهن ڳالهه جي اميد توهان زالن مان رکو ٿا تيئن اهي به توهان مان اهڙي ئي اميد رکن ٿيون.“