مردن جا حق
زال ۽ مڙس ڪٽنب جا ٻه وڏا رڪن هوندا آهن. مرد کي قدرت پاران عقل ۽ سمجهه جي لحاظ کان سگهارو ۽ مٿڀرو بنايو ويو آهي ۽ کيس ئي ڪٽنب جو سرپرست سمجهيو ويو آهي.
الله پاڪ به کيس ڪٽنب جو سرپرست ۽ ذميدار بنايو آهي. قرآن پاڪ ۾ فرمايو ويو آهي ته، ”مرد عورتن جا سرپرست آهن ڇو جو خدا ڪن ماڻهن کي ڪن ٻين تي مٿڀرائپ ڏني آهي.“
جيئن ته سماجي ذميوارين جي حوالي سان مرد جو رتبو مٿانهون آهي تنهن ڪري فطري طور تي مٿس ڪيتريون ئي ڏکيو ن ۽ نازڪ ذميداريون وڌيون ويون آهن. اهو ئي ڪٽنب جو انتظام سٺي نموني هلائي سگهي ٿو، گهر جي ماحول کي بهشت جهڙو بنائي سگهي ٿو ۽ زال کي هڪ ملائڪ جو روپ ڏئي سگهي ٿو.
حضور ﷺ جن فرمايو آهي ته، ”مرد ڪٽنب جا سرپرست هوندا آهن ۽ هر سرپرست تي پنهنجي ماتحتن ۽ ڀاتين جي ذميداري هوندي آهي.“
مرد کي، جيڪو حقيقت ۾ گهر جو مئنيجر هوندو آهي، پڻ اها ڳالهه ذهن ۾ ويهاري ڇڏڻ گهرجي ته عورت به مرد وانگر هڪ انسان ئي آهي. کيس به خواهشون ۽ اميدون رکڻ ۽ آزاديءَ جو حق حاصل آهي. مرد کي اها ڳالهه سمجهڻ گهرجي ته شاديءَ جو مطلب ڪنهن ڇوڪريءَ کي نوڪرياڻي بنائي گهر وٺي اچڻ ناهي هوندو، پر شاديءَ جو اصل مطلب زندگيءَ جي ساٿياڻي ۽ غم ونڊيندڙ کي گهر آڻڻ هوندو آهي. تنهن ڪري سندس دلي خواهش ۽ تمنائن تي پڻ ڌيان ڏيڻ گهرجي. ائين ناهي ته مڙس، زال جو نسورو مالڪ هوندو آهي ۽ سندس حيثيت هڪ بادشاهه جهڙي آهي. زال جا به مڙس تي ڪي حق آهن.
قرآن پاڪ ۾ فرمايو ويو آهي ته، ”جهڙي طرح زالن تي مڙسن جا فرض آهن تهڙيءَ طرح زالن جا به مڙسن تي حق آهن ۽ مردن کي مٿانئن مٿڀرائپ آهي.“