سَاڳي لاٽون سَاڳي ڏور، ساڳيو ڦِيرَڻ وارو آھي
سياست جو رنگ ڪَارو آھي
ڪڏھن ”ق“ ۾ ڪڏھن ”ن“ ۾ ڪيڏو ٺَڳُ ھوشيار آھي
سياست جو رنگ ڪَارو آھي
قوم ويچاري اَنڌِي ٻوڙِي
ڪونه سَڃاڻي نانگ ۽ نوڙِي
تَاڙين جي آ تَال تي ڊوڙِي
نَعري تي بَس نَعرو آھي
ھي ته وڏيرا روز وِڪامن
ڏاڏن، نانن، وانگي مامن
سَکڻي ڪُني وانگي اڀامن
ڪَھڙو مُنجھن موچارو آھي
تو لاءِ مون لاءِ شينھن جي ھي مَٽ
ڌارين اڳيان گِدڙ کان گھٽ
متان ڊِڄين ڏسي مُڇين جا وَٽ
ڪوڙو بي ڪردارو آھي
پيپلو ليگلو پراپرٽي آ،
کائڻ جِي ٻِنھي ٺاھِي گھٽِي آ،
توتي مون تي ٻيڻي چَٽِي آ،
شريف ھِت ويچارو آھي
ايم ڪيو ايم جا جوتا جوڙِين
نائن زيرو تي نِراڙ کوڙِين
کيرِ ڇَڏي پيا پاڻي وِلوڙين،
کوٽن تي کانگھارو آھي
رات ھُجي يا ڏِينھن ھُجي ،
گوڙ ھُجي يا مِينھن ھُجي،
سنڌ سان پَنھنجو نِينھن ھُجي،
”حافظ“ جو اِھو نعرو آھي.