ڪڻڪ جو ڏارو (دليه) تعليمي صلاحيتن ۾ اضافي جو باعث بڻجي ٿو
ساڳيءَ ريت ”چانورن جو ڀت“ جنهن ۾ سادي طريقي سان پڪل نرم چانور کير ۾ ملائبا آهن، سي به عام طور تي استعمال ٿيندا رهندا آهن. هينئر ڏسجي ته ساڳيون غذائي جنسون جديد مشينن ذريعي پيڪ ڪري، مختلف نالن سان بازار ۾ دڪانن تي وڪرو ڪيون وڃن ٿيون. مثال طور ڪارن فلڪس، (Corn-Flaks)، (Porridge)، ڪڻڪ، مڪئي، جوئر، چانورن وغيره جو دليو ”ٻاٽ“ دٻن ۾ بند دستياب آهي. جديد تحقيق ۾ اهو انڪشاف ڪيو ويو آهي ته ننڍپڻ ۾ ”دليه“ کائڻ سان ٻار ذهين طالبِ علم ثابت ٿين ٿا. ۽ امتحانن ۾ وڌيڪ نمبر حاصل ڪن ٿا.
دليي ۾ موجود جُزا ٻارن کي لکڻ، پڙهڻ ۽ هِجي ڪرڻ جي صلاحيتن کي وڌائين ٿا. ڏسجي ته اهي شيون اسان وٽ اصل کان زيرِ استعمال رهنديون آيون آهن ۽ هاڻي به ضروري آهي ته پنهنجي اصلي طور طريقي ۽ رواجي، ثقافتي اسٽائل ۾ غذا واپرائڻ وڌيڪ مفيد ۽ صحت بخش آهي. ڇو ته ائين ڪرڻ سان اسان جي غذا ۾ غذائي ڪئيلوريز مڪمل طور تي فائديمند رهن ٿيون ۽ ضايع نٿيون ٿين.
ننڍڙن ٻارڙن جي لاءِ اوٻاريل ڪڻڪ جو ڏارو، توڙي چانورن منجهه مرضيءَ مطابق ٿورو انب ملائي جوس واري مشين ۾ جوس وانگر ٺاهي، فرج ۾ رکجي ۽ ٿڌي ٿيڻ تي جڏهن ڪيڪ وانگر ڄمي وڃي ته ٽڪرا ٽڪرا ڪٽي ٻارن کي ذئقيدار بڻائي کارائجي. اِسڪول ويندڙ ٻارڙن لاءِ هڪ بهترين ”صحت بخش“ غذا ثابت ٿيندي.
* * *