سيد سراج احمد شاهه
پرور تو اڳيان پهچائن ٿا، فرياد لکين هڪ مان نه رڳو،
ڪجهه اهڙيءَ طرح دانهن جو گهرن ٿا داد لکين هڪ مان نه رڳو.
مخلوق سڄيءَ جو خالق تون ۽ رزق ڏئين ٿو رازق تون،
پوشاڪ به پائن ۽ کائن ٿا، کاڌ لکين هڪ مان نه رڳو.
سڀ سمنڊ نديون ۽ درياه جبل، توڻي ته رکيا ڪينجهر ۾ ڪنول،
انسان گلستانن ۾ ڪيئه آباد لکين هڪ مان نه رڳو.
سنسار سارو فنا آهي توکي ئي بقا آهي بيشڪ،
هن جسم جي پڃري مان ٿيندا، آزاد لکين هڪ مان نه رڳو.
مشڪل جي مهل تون ياد آهين ڪر ڪاٿي ڪهل تون ياد آهين،
روئي ٿا پڪارن توکي رب، نر ماد لکين هڪ مان نه رڳو.
تنهنجي ذات ڀلي آهي سائين تنهنجي تات ڀلي آهي سائين،
تنهنجي نالي سان ناشاد دليون ڪن، شاد لکين هڪ مان نه رڳو.
در تنهنجو ڇڏي منهنجا موليٰ ويندو ئي “سراج” آخر ڪاڏي،
توکان ٿا گهرن تڪليفن ۾، امداد لکين هڪ مان نه رڳو.
( محمد ياسين ڪنڀر جي ٿورن سان ناز پروڊڪشن ڪيسٽ واليوم 42
آواز حاجي امداد الله ڦلپوٽو صاحب)