وڌا ڪنهن ونگ ور واري؟ پُڇو واسينگ وارن کان؟
ڪيا ڪنهن چاڪ دل چيري؟ پُڇو ابرو اشارن کان؟
اٺيئي پهر عاشق کي، اکين ۾ انتظاري آ،
خنجر خوني ته کوڙيا ڪنهن، پُڇو تحقيق تارن کان؟
سڪايل جي سِسي سالم، نه ديکيم ڌڙ دُرس ڪوئي،
بنان ڌڪ ڌار ڌڙ ڪيا ڪنهن، پُڇو تيرن ترارن کان؟
ڦوڙائي جا فراقي ڦٽ، ڇُٽا سي ڇيڪ ناهن ڪنهن،
وڇوڙي ۾ ولوڙيا ڪيئن، پُڇو سڪ جي سچارن کان؟
لنگهي سڪ سير جون سختيون، سَوَن مان ڪو پُنو ساحل،
ڇڏيا ڇولين ڇو ڇولي؟، پُڇو سالڪ سونهارن کان؟
جبل جهرجهنگ جهاڳيا جن، مليو محبوب تن مرڪي،
لڌو تن لال ڪيئن لوچي، پُڇو پانڌي پيارن کان؟
نماڻا نيڻ ٻئي نشتر، نهوڙي نيٺ مون نيندا،
قتل ڪن ڪيئن ٿا ”شورا“ پُڇو نرگس نظارن کان؟
***
(30 ڊسمبر 1983ع سومرو لغاري سريوال)