بحر بر کي ڳولجي شمس و قمر کي ڳولجي
پر انهي کان اڳڀرو دل جي ننگر کي ڳولجي.
اَرڙ جي زهرن سندو ترياق آ جنهن جو لُعاب،
زندگي جي راهه ۾ اهڙي بشر کي ڳولجي.
منزلِ مقصود تي هر شيءِ ميسر آ مگر،
ڪاروان لاءِ قوي ڪنهن راهبر کي ڳولجي.
ٿيو منهنجو اعزاز آ، توهين رسوائي رڳو،
تنهنجي در جي شام ملنديئي سحر کي ڳولجي.
ٿيو جڏهن کان درد خود دل جو معالج دوستو!
دوستن آ فرض ڀانيو چاره گر کي ڳولجي.
چشم دنيا ۾ تماشو آهين تون ”شورا“ بنيو،
تنهنڪري ئي پنهنجي در کي پنهنجي گهر کي ڳولجي.
***
17 ڊسمبر 1984ع مسڻ وڏي