هي جذبو موسمي شبنم نه آهي
محبت جي ته ڪا موسم نه آهي.
فقط پٿر جو ٽڪرو آهي دل سان،
جنهن جي اندر ڪنهين جو غم نه آهي.
ڪجي پنهنجي عقل ۽ هوش سان ڪم،
حياتي جو ذڪر مبهم نه آهي.
فرشتن ٿي ڪيا سجدا جنهين کي،
هي آدم، ڇا اهو آدم نه آهي؟
منهنجي سِر لاءِ هي ڦاسيون ۽ ڦاها،
منهنجو سر پوءِ به ڇا لئه خم نه آهي.
سڀئي وڇڙي ويا پنهنجا پراوا،
ڪوئي رشتو هتي محڪم نه آهي.
مسلسل ڪَرب ۾ ڀي مُرڪ جاري،
هي ”شورا“ حوصلو ڪجهه ڪم نه آهي.
***
25 نومبر 1985ع مسڻ وڏي