وسڪاري جا ڏينھن، ٿڌڙا ٿڌڙا ڏينھن،
آءُ تہ گڏجي گهاريون.
وسيا ڄاڻ تہ وسيا، هي جي مندائتا مينھن،
اکيون آهن اڃاريون،
آءُ تہ گڏجي گهاريون.
پرچي سرچي پاڻ ۾، لايون نوان ڪي نينھن،
پويان پل وساريون،
آءُ تہ گڏجي گهاريون.
سونھن ورونھن مان سرجيو، جيڪو نينھن سنينھن،
آءُ تہ نينھن نکاريون،
آءُ تہ گڏجي گهاريون.
جاني جوڀن جا هجن متان پويان ڏينھن،
واري تن کي واريون،
آءُ تہ گڏجي گهاريون.
مٺڙا مند ملھار جي، آهي ٻٽڙي ڏينھن،
تن من تن تان واريون،
آءُ تہ گڏجي گهاريون.