شهدادڪوٽ ۾ لائبرري جو قيام
ڊي سي صاحب چيو ته وڃ ۽ تياري ڪر، ٻن ڏينھن کان پوءِ مان پاڻ اتي ايندس. مان واپس وڃي انجنيئر بلڊنگ کي ڊي سي صاحب جي اچڻ متعلق ٻڌايو، ٻئي ڏينھن بلڊنگس جو انجنيئر آيو ۽ سرزمين تي پھچي چوني سان لي آئوٽ پلان ڏنو، جنھن ۾ ڪتابن رکڻ، ريڊنگ روم، آفيس ۽ ان سان لاڳاپيل جيڪي به ضروري شيون هيون، زمين تي چوني جي مدد سان تيار ڪري رکيو. جڏهن ڊي سي صاحب آيو ته سر زمين تي وٺي ويم، کھاوڙ صاحب ۽ ٻيا به چڱا مرد اچي گڏ ٿيا. ڊي سي صاحب پلان ڏسي خوش ٿيو ۽ چيو ته ڪم شروع ڪيو، باقي جيترو ڪم ٿيندو ويندو ماپ جي حساب سان پيمينٽ ٿيندي ويندي.
الله جي مھرباني سان شھدادڪوٽ جي عوام لاءِ هڪ زبردست لائبريري ٺھڻ جو ڪم شروع ٿي ويو ۽ تقريباً ڏهه يارهن مھينن ۾ لائبريري جي بلڊنگ تيار ٿي وئي. لائبريري جي اڏاوت تقريباً مڪمل ٿيڻ واري هئي ته منھنجو پروموشن ٿي ويو ۽ مان آخري اسٽيج تي ڪم پھچائي چارج ڏئي ڪراچي اچي رپورٽ ڪيو.