آتم ڪٿا / آٽوبايوگرافي

چانڊڪا ۽ ملينيئم گرل (يادگيريون)

سدائين مُرڪندڙ چھري وارو ڊاڪٽر محمد اسماعيل ماڪو. ڊاڪٽر تہ ڀلو ۽ ماهر آهي، پر اُن کا وڌيڪ اِنسان دوست ۽ آدميت جو احترام ڪندڙ آهي. سڄاڻ ليکڪ ۽ شاعر. لطيفي فڪر کي پنهنجي نظر سان پرکيندڙ ۽ بيان ڪندڙ ۽ ڪمال جو داستان گو آهي. ڪتاب ”چانڊڪا ۽ ملينيئم گرل“ چانڊڪا ميڊيڪل ڪاليج جي يادگيرين ۽ واٽس ايپ گروپ تي لکيل مضمونن ۽ نثري ٽڪرن تي مشتمل دلچسپ ڪتاب آھي. ڪتاب ۾ رڳو شاگردن ۽ استادن جا قصا ناھن پر ڪيتريون ئي يادون، دلچسپيون ۽ تاريخي ڳالھيون پڻ شامل آھن. ڪتاب جي آخر ۾ ڊاڪٽر ماڪي، پنھنجن واسطيدار ڊاڪٽرن جا مختصر تعارف بہ شامل ڪيا آهن، جيڪي هڪ تسلسل ۾ هن ڪتاب جو حصو آهن.
Title Cover of book چانڊڪا ۽ ملينيئم گرل (يادگيريون)

ڊاڪٽر محمد اسماعيل ماڪو گهڻين خوبين وارو ماڻھو

جيئن تہ ڊاڪٽر صاحب جو آئون وڏو ڀاءُ آهيان ۽ سندس پرورش ڪرڻ جو اعزاز بہ مون کي حاصل آهي. ڊاڪٽر صاحب جو ڪتاب سندس حقيقي مشاهدي تي منحصر آهي. ڊاڪٽر صاحب تي لکڻ لاءِ گهڻو ڪجهہ آهي پر اهو ضرور چوندس تہ هي علم جو بحر آهي. ننڍپڻ ۾ کيس انگن اکرن تي ايڏي مھارت هئي جو هو ڪروڙن جا ٽوٽل سيڪنڊن ۾ ڪندو هو. اهوئي سبب آهي جو منھنجي والد صاحب مرحوم جي هڪ دوست مرحوم محمود جيھي کيس ”جادوگر“ جو لقب ڏنو ۽ ڊاڪٽر صاحب سان ڪچھري ڪري مزو وٺندو هو. ڊاڪٽر صاحب پنھنجي پيشي سان پڻ ديانتداري سان نڀايو آهي ۽ هو گهڻين ئي خوبين جو مالڪ آهي ۽ ان سان گڏ لطيف سرڪار جو وڏو پارکو پڻ آهي. هر سال لطيف سرڪار جو عرس پنھنجي ڳوٺ ۾ وڏي اهتمام سان ڪندو آهي.
ڊاڪٽر صاحب ننڍپڻ کان ڪيترن ئي تقريري مقابلن ۾ حصو ورتو ۽ ڪيترائي انعام پڻ کٽيا. هو هڪ ملنسار ۽ شفيق انسان آهي. ڌڻي در دعا آهي تہ کيس وڏي ڄمار عطا ڪري.

فقير امان ﷲ ماڪو

باني
”الفرقان اسلامڪ ريسرچ انسٽيٽيوٽ
اينڊ ميوزم سکر“