آتم ڪٿا / آٽوبايوگرافي

چانڊڪا ۽ ملينيئم گرل (يادگيريون)

سدائين مُرڪندڙ چھري وارو ڊاڪٽر محمد اسماعيل ماڪو. ڊاڪٽر تہ ڀلو ۽ ماهر آهي، پر اُن کا وڌيڪ اِنسان دوست ۽ آدميت جو احترام ڪندڙ آهي. سڄاڻ ليکڪ ۽ شاعر. لطيفي فڪر کي پنهنجي نظر سان پرکيندڙ ۽ بيان ڪندڙ ۽ ڪمال جو داستان گو آهي. ڪتاب ”چانڊڪا ۽ ملينيئم گرل“ چانڊڪا ميڊيڪل ڪاليج جي يادگيرين ۽ واٽس ايپ گروپ تي لکيل مضمونن ۽ نثري ٽڪرن تي مشتمل دلچسپ ڪتاب آھي. ڪتاب ۾ رڳو شاگردن ۽ استادن جا قصا ناھن پر ڪيتريون ئي يادون، دلچسپيون ۽ تاريخي ڳالھيون پڻ شامل آھن. ڪتاب جي آخر ۾ ڊاڪٽر ماڪي، پنھنجن واسطيدار ڊاڪٽرن جا مختصر تعارف بہ شامل ڪيا آهن، جيڪي هڪ تسلسل ۾ هن ڪتاب جو حصو آهن.
Title Cover of book چانڊڪا ۽ ملينيئم گرل (يادگيريون)

خدا ترس انسان

”ڊاڪٽر“ لفظ ئي اهڙو آهي جنھن جي ٻڌڻ سان مريض کي ايتري آٿت ضرور ٿيندي آهي تہ سندس تڪليف جو ڪو نہ ڪو ازالو ضرور ٿيندو ۽ وري انھيءَ شعبي ۾ جيڪڏهن سائين محمد اسماعيل ماڪي جھڙا نرم دل ۽ خداترس ماڻھو شامل هوندا آهن تہ مريض جو اڌ علاج تہ سندن سڀاءُ سان ئي ٿي ويندو آهي. هونئن ڪنھن کي بيھوش ڪرڻ هاڪاري ڪم ناهي پر جڏهن اهو ڪنھنجي زندگي بچائڻ لاءِ هوندو آهي تہ پوءِ اهو عمل بہ عبادتن ۾ شمار ٿي ويندو آهي. سائين اسماعيل صاحب اهڙين ئي عبادتن ۾ مصروف رهندڙ آهن ۽ مٿان وري اهو جو سندن ادب سان لڳاءُ بہ اهڙو جو سچ ۾ هُو ڪنھن جي دعا وانگر لڳندا آهن. لکڻ جي حوالي سان بہ سندن تعلق شاگردي واري دور کان ئي رهيو آهي. ان جو هاڪاري نتيجو اهو نڪتو آهي جو سالن پڄاڻان جيڪو سندن من ۾ سانڍيل هو سو بہ ڪڍي پڙهندڙن آڏو رکيو اٿائون. هڪ رومانس جو پورو دور سنڌ يونيورسٽيءَ بعد چانڊڪا ميڊيڪل ڪاليج جو بہ رهيو آهي. اهي تعليمي ادار سنڌي ادب ۾ استعارو ۽ تشبيھہ بہ بڻجي ويل آهن. ماڪي صاحب ان دور جي يادگيرين کي جنھن سيبتي نموني لکيو آهي ڄڻ تہ اسين ان دور ۾ داخل ٿي ويا هجون. هي رڳو سندن يادگيريون ئي ناهن پر تاريخ بہ آهي ۽ سڀ کان اهم ڳالھہ تہ هنن لکڻين ۾ توهان کي ادبيت پوري ريت بکندي نظر ايندي. ڪتاب جا تفصيل ان ڪري نہ پيو ڏيان جو اهو فيصلو پڙهندڙ پاڻ ڪن، پر منھنجي راءِ موجب هي يادگيريون واقعي پڙهڻ جهڙيون آهن.

ممتاز بخاري
سکر