منھنجو بابا
ممڪن آهي ڌرتيءَ جو دک پورو ڪو نہ ٿئي،
ممڪن آهي تنھنجو بابا وڙهندي جان ڏئي.
ويڙھہ ڪا ميداني جنگ ۾ نہ ٿي وڙهجي، پر اها ويڙھہ جھالت، حق سچ ۽ بيمارين خلاف بہ ٿئي ٿي. منھنجو بابا سچ جو اُهو سگهارو ڪردار آهي جنھن ڪڏهن بہ ڪوڙ نہ ڳالھايو ۽ ڪوڙ خلاف وڙهندو رهيو آهي. ان زماني جا نرالا رويا بہ ڏٺا مگر مسڪرائيندو رهي ٿو. هن جون تحريرون مان پڙهندي رهندي آهيان پر مون سوچيو بہ ڪو نہ هو تہ بابا چانڊڪا جي هر شيءِ من ۾ سنڀالي رکندو ۽ منفرد نموني لکندو به، مان ڊاڪٽر آهيان ۽ اُهو پيشه ورانہ اتساھہ بابا جي زندگيءَ مان ئي ورتو آهي تہ ڪيئن ماڻھو پنھنجي پيشي سان ڪميٽيڊ رهي ٿو. مان gen-z جين زي آهيان. انٽرنيٽ ۽ موبائل فون ۽ مصنوعي ذهانت جي دور ۾ پلي وڏي ٿي آهيان، مگر بابا جو دماغ سوپر ڪمپيوٽر وانگر آهي تہ مسئلن کي ڪيئن حل ڪجي. تنازعن کي ڪيئن ختم ڪجي ۽ ماڻھو پنھنجي ڌرتي، ماڻھن، ماحول ۽ ڪٽنب سان ڪيئن ڳنڍيل رهي، عمر جو فرق ڪيئن مٽائجي ۽ ڪيئن نئين نسل سان جڙيل رهجي، مان بابا لئہ چوندي آهيان هو جينيس آهي. هومحنتي آهي، هن اسان کي زندگي سٺي معياري زندگي، اخلاق، آدابن ۽ عزت سان گذارڻ سيکاري آهي. هو منھنجو بابا بہ آهي تہ هڪ سٺو دوست به، مان هن سان بنا جهجهڪ هر مسئلو شيئر ڪندي آهيان ۽ ڏاڍي صبر سان منھنجي ڳالھہ ٻڌي ان تي انتھائي پيارو ردعمل ڏيندو آهي. مان چونديس تہ سڀ والدين بابا وانگر اولاد سان جڙيل رهن. مان هميشہ فخر ڪندي آهيان تہ بابا جي ڪري اولاد کي عزت نصيب ٿئي ٿي. بابا جو شاھہ لطيف کي ٻڌائڻ تہ ڪمال آهي. مان پلاننگ ڪيان ٿي تہ بابا جي لطيفيات جي شوق کي نمايان ڪيان ۽ مان هڪ پروگرام ترتيب ڏئي رهي آهيان تہ ”ڊاڪٽر ثنا وٿ بابا ۽ لطيف“.
ڊاڪٽر ثنا اسماعيل ماڪو