ڊاڪٽر اسماعيل، هڪ بھترين دوست
مان سموري سچائيءَ سان چوان ٿو تہ ٻئي اسان جا دوست انتھائي ذهين هئا. ڊاڪٽر اسماعيل سان دوستي چانڊڪا جي پھرئين سال کان ٿي ۽ ائين وڌندي وڌندي گهري دوستي ۾ بدلجي وئي. ڊاڪٽر اسماعيل ماڪو في البديع ڊبيٽر هو. ڇا تہ ڪمال جي رواني هئي سندس تقرير ۾ ۽ يقيناً اها سندس مطالعي جي نشاني بہ هئي ۽ نہ رڳو ايترو پر شاعري ۾ پڻ تمام سٺي ۽ زبردست شاعري ڪندو هو. لطيف ميڊيڪوز پاران اسان هن کي ڊبيٽنگ سيڪريٽري طور بيھاريو هيوسين. سندس مقابلو ڊاڪٽر مجتبيٰ ميمڻ سان هو جيڪو چوٿين سال جو شاگرد هو ۽ سپاف جو مشھور ليڊر هو. مون سندس ڀرپور ورڪ ڪئي پر تمام ٿورن ووٽن سان هارايوسين. اهو مقابلو ڪرڻ ئي وڏي ڳالھہ هئي جيڪو محمد اسماعيل ماڪي جي صلاحيتن جي ڪري ئي ممڪن هو. ڪرڪيٽ جو بہ شوقين ۽ بالر وڌيڪ هو. ٽينس بال سان بہ شاندار بالنگ ڪندو هو.
لطيف ميڊيڪوز هڪ مئگزين ڪڍندي هئي. جنھن جو مان ايڊيٽر هوس ۽ مان اڪثر هن کي گڏ کڻندو هوس مون کي ياد پئي ٿو تہ اسان ٻنھي ڊاڪٽر نيڪ محمد صاحب جو انٽرويو بہ ڪيوسين ۽ اهو تمام گهڻو مشھور ۽ مقبول ٿيو جيڪو بي بي سي جي پروگرام هارڊ ٽاڪ جي طرز تي ورتو هئوسين. لطيف ميڊيڪوز جي ڳالھہ هلي ٿي تہ ان جا ثناءُﷲ کوکر صاحب سان جيڪو لطيف ميڊيڪوز جو سرواڻ يا باني هو ۽ انتھائي محنتي شخص بہ هو ۽ هُو Autocrat هو ڇاڪاڻ تہ سندس گذارو بہ ان ۾ ئي هوندو هو ۽ ان سان اسماعيل جا اختلاف ٿيا. ان اسماعيل کي يا تہ خارج ڪرائي ڇڏيو يا استعيفا ڏيڻ تي مجبور ڪيو. ان ضد ۾ مان ثناءُﷲ جي سامھون ٿيس ۽ لطيف ميڊيڪوز جي اليڪشن ۾ ثناءُﷲ کي شڪست ڏنيسين ۽ اسماعيل ماڪو وري ان ۾ شامل ٿيو.
هن ڪتاب ۾ اسماعيل ماڪا تمام گهڻي محنت ڪئي آهي. چانڊڪا جي تاريخ دهرائي وئي آهي جيڪا پڙهندڙ تمام گهڻو پسند ڪندا، منھنجو خيال آهي هي جيڪا چانڊڪا ميڊيڪل ڪاليج جي تاريخ آهي جيڪا ان وقت هئي يا ان کان ٿورو اڳتي هئي ۽ اسان جي بئج جي آخري ٽائيم تائين هئي. اها جيڪا آهي سا هن ۾ توهان کي تمام گهڻي ملندي. کوڙ اهڙيون شيون هيون جيڪي مون کي بہ ياد نہ هيون جيڪي اسماعيل ماڪا هن ڪتاب ۾ لکيون آهن جيڪا هڪ پراڻي فلم وانگر آهي جنھن کي ڏسي اسين سمجهيوسين تہ هي بہ شيون ٿيون هيون ۽ ٿينديون رهيون. اسماعيل ماڪا لکڻ جو بادشاھہ آهي. پڙهڻ جو بہ بادشاھہ آهي ۽ پنھنجي ڪم جو بہ بادشاھہ آهي.
منھنجي دعا آهي تہ اسماعيل ماڪو اڃان بہ گهڻي کان گهڻيون ڪاوشون جيڪي دل ۾ اٿس انھن ۾ کيس ڪاميابي نصيب ٿئي ۽ سندس ٻچا خوش هجن. انھن کي پڙهائي وڏو ڪيو اٿائين. انھن کي صحيح تعليم ڏنائين ۽ گهر بہ هلائي ٿو اهي سندس ڪاميابيون آهن. اميد تہ هي ڪتاب اوهان کي تمام گهڻو پسند ايندو.
پروفيسر ڊاڪٽر ملڪ جلباڻي
لاڙڪاڻو