ڊاڪٽر محمد اسماعيل ماڪو- هڪ بيباڪ شخصيت
ڪجهہ ڏينھن کان ھو رابطي ۾ ھو. جيئن تہ ھو الڳ ٿلڳ منفرد قسم جي طبيعت رکندڙ ماڻھو آھي، پر ان سان گڏ کلڻو ملڻو، بيباڪ، مزاح پسند. سو ھن جي چانڊڪا جي يادگيرين تي مشتمل ڪتاب ۾ اھي سمورا رنگ نمايان نظر اچن ٿا. ھن جو ڪتاب ٽن بابن تي مشتمل آھي جنھن ۾ پھريون حصو چانڊڪا ميڊيڪل ڪاليج ۾ داخلا ۽ پنجن ڇھن سالن دوران جيڪي ڪجهہ ھن ڏٺو پسيو مطلب جيڪي ھن جي سامھون ٿيو، جنھن ۾ ھن وڏي خوبصورتي ۽ مھارت سان سڀني دوستن، شاگردن، ڪامريڊن ۽ پنھنجي استادن جو ذڪر ڪيو آھي. آءٌ سمجهان ٿو ان ۾ تقريباً چانڊڪا ۾ رھندڙ ھر فرد جو ذڪر ڪيو اٿائين، ويندي سينيٽري ورڪر ۽ پي اون جو به، ان سان گڏ گهمڻ ڦرڻ، سير سپاٽا موجون مستيون، رانديون مطلب تہ وڏي باريڪ بيني سان لکيو اٿس. ٻي چيپٽر ۾ ھن پنھنجي انھن دوستن جو ذڪر ڪيو آھي جيڪي ھن دنيا ۾ ناھن رھيا ۽ مالڪ حقيقي سان وڃي مليا آھن. ھنن جا واٽس ايپ پروفائيل، ٽين چيپٽر ۾ ميڊڪل بابت شروعاتي ۽ بنيادي معلومات ڏنل آھي جنھن بابت ڊاڪٽري جا اصول ھسٽري وٺڻ ۽ مڪمل چيڪ اپ ڪرڻ شامل آھن. ھي ڪتاب چانڊڪا سان گڏ سڀني ادبي دوستن کي پڙھڻ گهرجي ھن ڪتاب آڻڻ سان اھو ٿيندو تہ ڪجهہ سالن جي تاريخ رقم ٿي ويندي. ڪجهہ سالن جي تاريخ مون لکي آھي ۽ اڳتي وري ھڪ ٻن دوستن چانڊڪا بابت پنھنجي دور جون ساروڻيون يادگيريون لکيون تہ سموري ڪاليج جي تاريخ رقم ٿي ويندي ۽ ھي ڪتاب ادب ۾ خوبصورت واڌارو ثابت ٿيندا. اھڙي معلوماتي ۽ چانڊڪا جي يادگيرين جي ڪتاب آڻڻ تي ڊاڪٽر اسماعيل ماڪو جس لھڻو. دعا آھي تہ سدا آباد ۽ سکيو ۽ سرھو رھي. آمين.
ڊاڪٽر وحيد سمائر
لاڙڪاڻو