آتم ڪٿا / آٽوبايوگرافي

چانڊڪا ۽ ملينيئم گرل (يادگيريون)

سدائين مُرڪندڙ چھري وارو ڊاڪٽر محمد اسماعيل ماڪو. ڊاڪٽر تہ ڀلو ۽ ماهر آهي، پر اُن کا وڌيڪ اِنسان دوست ۽ آدميت جو احترام ڪندڙ آهي. سڄاڻ ليکڪ ۽ شاعر. لطيفي فڪر کي پنهنجي نظر سان پرکيندڙ ۽ بيان ڪندڙ ۽ ڪمال جو داستان گو آهي. ڪتاب ”چانڊڪا ۽ ملينيئم گرل“ چانڊڪا ميڊيڪل ڪاليج جي يادگيرين ۽ واٽس ايپ گروپ تي لکيل مضمونن ۽ نثري ٽڪرن تي مشتمل دلچسپ ڪتاب آھي. ڪتاب ۾ رڳو شاگردن ۽ استادن جا قصا ناھن پر ڪيتريون ئي يادون، دلچسپيون ۽ تاريخي ڳالھيون پڻ شامل آھن. ڪتاب جي آخر ۾ ڊاڪٽر ماڪي، پنھنجن واسطيدار ڊاڪٽرن جا مختصر تعارف بہ شامل ڪيا آهن، جيڪي هڪ تسلسل ۾ هن ڪتاب جو حصو آهن.
Title Cover of book چانڊڪا ۽ ملينيئم گرل (يادگيريون)

جان جيڪب جي گهوڙي جي قبر

ڪالھہ شھيد محترمہ بينظير ڀٽو MCH سينٽر جيڪب آباد وزٽ تي وڃڻ ٿيو، ڊاڪٽر اسلم عباسي جان جيڪب جي مردہ گهوڙي جي پڪي قبر ڏيکاري، مون کي سانولو بڙدي ياد آيو، جنھن کي انگريزن ڦاھي ڏئي ماريو ھو، مون کي خانگڙھ جا مزاحمتي ڪردار مري، کوسا، رند، جکراڻي. بليدي، بلوچ، ڄاموٽ باغي ڪردار ياد آيا جن انگريز سان ڌرتي لاء مزاحمت ڪئي، ۽ جنگ وڙھي. ۽ ان گهوڙي تي چڙھي جان جيڪب انھن کي ڳولھي ڳولھي ماريو ھو، مون گهوڙي لاء مغفرت جي دعا گهري، ٻاھر اڌ اگهاڙو ٻار پنندي نظر آيو، ڏاڍي شرمساري ٿي، تہ انگريز پنھنجي مڙدہ گهوڙي جو خيال رکندا ھئا، ۽ اسان پنھنجي زندہ انسانن جو خيال نہ ٿا ڪريون.