ماهواريءَ جو حال احوال The Menstrual History
مريض کان اهو پڇو تہ هن کي ماهواري ڪھڙي عمر کان شروع ٿي هئي، جيڪڏهن ماهواري اچڻ بند ٿي وئي اٿس تہ اهو پڇجيس تہ ماهواريءَ کي بند ٿئي ڪيترو عرصو ٿيو آهي؟ عام حالتن ۾ عورتن ۾ 45 سالن جي عمر کان پوءِ ماهواري اچڻ بند ٿي ويندي آهي.
مريض کان معلوم ڪيو تہ هن جو عام رواجي جيترو خون ماهواريءَ دوران زيان ٿيندو آهي اوترو زيان ٿيندو اٿس، اهو گهٽ يا وڌ تہ خارج نہ ٿو ٿئي مريضه کان اهو معلوم ڪيو تہ ماهواري ڪيترا ڏينھن هلندي اٿس؟.
جيڪڏهن ماهواري ٻن ڏينھن کان گهٽ ۽ اٺن ڏينھن کان وڌيڪ هليس ٿي تہ اها غير صحتمندي جي علامت آهي ماهواريءَ اچڻ کان اڳ مريضه ذهني طور ڪيئن محسوس ڪندي آهي؟ ماهواري دوران سور ٿيندو اٿس يا نه؟ ان کان علاوہ مريض کان اهو پڇجي تہ ڇا هن ڄم روڪ دوائون وات ذريعي تہ نہ واپرايون آهن؟.