آتم ڪٿا / آٽوبايوگرافي

چانڊڪا ۽ ملينيئم گرل (يادگيريون)

سدائين مُرڪندڙ چھري وارو ڊاڪٽر محمد اسماعيل ماڪو. ڊاڪٽر تہ ڀلو ۽ ماهر آهي، پر اُن کا وڌيڪ اِنسان دوست ۽ آدميت جو احترام ڪندڙ آهي. سڄاڻ ليکڪ ۽ شاعر. لطيفي فڪر کي پنهنجي نظر سان پرکيندڙ ۽ بيان ڪندڙ ۽ ڪمال جو داستان گو آهي. ڪتاب ”چانڊڪا ۽ ملينيئم گرل“ چانڊڪا ميڊيڪل ڪاليج جي يادگيرين ۽ واٽس ايپ گروپ تي لکيل مضمونن ۽ نثري ٽڪرن تي مشتمل دلچسپ ڪتاب آھي. ڪتاب ۾ رڳو شاگردن ۽ استادن جا قصا ناھن پر ڪيتريون ئي يادون، دلچسپيون ۽ تاريخي ڳالھيون پڻ شامل آھن. ڪتاب جي آخر ۾ ڊاڪٽر ماڪي، پنھنجن واسطيدار ڊاڪٽرن جا مختصر تعارف بہ شامل ڪيا آهن، جيڪي هڪ تسلسل ۾ هن ڪتاب جو حصو آهن.
Title Cover of book چانڊڪا ۽ ملينيئم گرل (يادگيريون)

ڊاڪٽر اسماعيل ماڪو هڪ ذهين لکاري

ڊاڪٽر اسماعيل منھنجو چاچو بہ آهي تہ سٺو دوست بہ آهي. اسان هم عمر آهيون پھرئين درجي کان وٺي ايم. بي. بي. ايس تائين گڏ پڙهيا آهيون. هن جي قلم ۾ اُها طاقت آهي جو سڀني کي موهي ڇڏي ٿو. ائين لڳي ٿو تہ هي ڪتاب مون لکيو آهي اُهو ئي ان جي لکڻ جي فن جو ڪمال آهي جو هو شگفتہ تحريرن جو ماهر آهي. مون هن کي کلندي، لکندي، پڙهندي ۽ ڪم ڪندي ڏٺو آهي. اسان جو روم هڪ سياسي، عوامي ۽ دوستن جي اوطاق هو. مگر پوءِ بہ هو باقاعدہ، لائبرري وڃي پڙهندو هو. پڙهڻ، لکڻ جو هن کي جنون آهي. هو سٺو انسان، سٺو ڊاڪٽر، سٺو دوست ۽ سٺو مائٽ پڻ آهي. مان ان لاءِ گهڻو نہ ٿو لکان. ڇو جو هن جي تحرير اوهان سان ڳالھائيندي ۽ اوهان خود اندازو لڳائيندئو تہ هن جي تحرير ۾ ڪھڙو منفرد جوهر آهي.

ڊاڪٽر محمد عثمان ماڪو
سکر