هِڪَ عاشق جي يادُن جي ڪائنات
ڊاڪٽر محمد اسماعيل ماڪو صاحب جو ڪِتاب ڪمپوز ڪرڻ وقت مون مَٿان هڪ عجيب قِسم جي ڪيفيت طاري هُئي. اِهڙي ڪيفيت ممتاز بخاريءَ جي ناول "تنھنجو انتظار ڪرڻو آهي" جي پروف ريڊنگ ڪَرڻ وَقت ٿي هُئي. ڪِتابُ ڪمپوز ڪرڻ وقت نہ ڄاڻ ڪيترا ڀيرا مُنھنجي دل ڌڙڪي هئي ۽ نہ ڄاڻ ڪيترا ڀيرا مُرڪيو ۽ رُنو هيس جو سائينءَ پَنھنجي يادُن کي اهڙي تہ انداز سان پيش ڪيو ۽ ايتريون تہ تشبيھون ڏنيون آهن جو حيرتُن جي سمنڊ اندر لھندو وڃان. ڪي ڪِتابَ اهڙا هوندا آهن جو اوهان (پڙهندڙ) اُن تحرير ۾ موجود ڪِردار بڻجي ويندا آهيو، اُنَ جي خوشي بڻجي ويندا آهيو، اُن جو درد بڻجي ويندا آهيو، اُن جي محسوسات بڻجي ويندا آهيو. ڪِردار جي دل جيان اوهان جي دل بہ ڌڙڪندي رهندي آهي. اهڙي ڪيفيت پڙهندڙ جي ذهن تي ڪيئي ڏينھن خمارن جيان پئي رهندي آهي.
ڊاڪٽر محمد اسماعيل ماڪو صاحب جيڪو ڪجهہ بہ لکيو آهي هُنَ پنھنجي اندر جي سموري ڪائنات پَني تي سَجائي ڇڏي آهي. اهڙي ڪائنات جيڪا ڪوڙ ۽ منافقي کان پاڪ آهي. اهڙي ڪائنات جنھن ۾ زندگي ساھہ ٿي کڻي. اهڙي ڪائنات جنھن ۾ هو بادشاهن وانگر رهيو آهي. اهڙي ڪائنات جيڪا هڪ سچي پچي عاشق جي ڪائنات آهي.
ڊاڪٽر محمد اسماعيل ماڪو صاحب جي هيءَ تحرير عِشق آهي ۽ هو پاڻ عاشِق آهي. هُنَ جو ذهن ڪمپيوٽر کان بہ تيز ڊوڙندڙ هڪ اهڙي مَشين آهي جيڪا پَل ۾ 30سالَ پُراڻيون يادن کي سھيڙي آڏو رکي ٿي جنھن ۾ ڪو بہ error نہ آهي ۽ نہ ئي اُن سي ڊي ۾ ڪي scratch آهن.
ڊاڪٽر صاحب هن ڪِتابَ سان گڏ پَنج ٻيا بہ ڪتاب ڏيکاريا آهن جن کي پڻ ڇپرائڻ جو خواهشمند آهي. اُنھن مان هڪ ڪِتابُ اهڙو آهي جنھن ۾ عام ماڻھن، پَر ڊاڪٽر صاحب جي لاءِ خاص ۾ خاص شخصيتن تي شاعريءَ ذريعي ڀيٽا پيش ڪئي وئي آهي. اهڙو ناياب ۽ نادر ڪم تہ ڪو عاشق ئي عشق ۾ ڪري سگهي ٿو.
امرايازمھر
سکر